رفعت اللہ اورکزئی بی بی سی اردو ڈاٹ کام پشاور

	ہنگو میں تین ہفتے قبل مقامی طالبان کی طرف سے دوابہ پولیس سٹیشن کا محاصرہ کرنے کے بعد فوج نے علاقے میں آپریشن شروع کیا تھا

اس بات کا فیصلہ سنیچر کو ہنگو میں ضلعی رابطہ افسر کے دفتر میں ہونے والے ایک جرگہ میں ہوا جس میں درسمند، کربوغہ شریف، زرگیری، شنہ وڑی، نریاب، دوآبہ، چپری نریاب، کاہی اور سہ روزی کے اقوام کے سو سے زائد مشران نے شرکت کی۔

جرگہ میں شامل درسمند یونین کونسل کے ناظم ملک جلیل الرحمان نے بی بی سی کو بتایا کہ درسمند سے لیکر ہنگو تک تمام اقوام نے اس بات پر اتفاق کرلیا کہ علاقے میں عسکریت پسند یا مسلح تنظیموں سے تعلق رکھنے والے افراد کو پناہ نہیں دی جائیگی اور نہ ہی ان کی کسی قسم کی مدد کی جائےگی۔

انہوں نے کہا کہ تمام اقوام نے متقفہ طورپر فیصلہ کیا کہ ہر قوم یا قبیلہ اپنے علاقے میں امن وامان کی بحالی کا خود ذمہ دار ہوگا اور اگر ضروت پڑی تو اقوام ایک دوسرے کی بھی مدد کریں گے۔

ناظم نے کہا کہ جرگہ نے حکومت سے پر زورمطالبہ کیا کہ وہ جی ٹی روڈ پر امن وامان بحال کرنے کےلئے موثر اقدامات کرے جبکہ اقوام ہر علاقے اور گاؤں کی سطح پر حکومت سے مکمل تعاون کرینگے۔

واضح رہے کہ اس سے قبل ہنگو آپریشن کے دوران بھی کربوغہ اور تورہ اوڑی میں قبائلی جرگوں نے طالبان کو پناہ دینے اور ان کی مدد کرنے پر پابندی لگائی تھی۔

ہنگو میں تقریبًا تین ہفتے قبل مقامی طالبان کی طرف سے دوابہ پولیس سٹیشن کا محاصرہ کرنے کے بعد فوج نے علاقے میں آپریشن شروع کیا تھا جو تقریباً دس دنوں تک جاری رہا۔ اس آپریشن کے دوران سارا علاقہ بری طرح متاثر ہوا ہے جبکہ ہزاروں لوگوں نے بچوں اور خواتین سمیت محفوظ مقامات کی طرف نقل مکانی کی تھی۔