ریاض سہیل بی بی سی اردو ڈاٹ کام، کراچی

	الدعوۃ سکول کے اساتذہ کا الزام ہے کہ پولیس انہیں ہراساں کر رہی ہے

منتظمین نے الزام لگایا ہے کہ پولیس اور دیگر اداروں کے اہلکار سکول میں آکر اساتذہ اور بچوں کے کوائف طلب کر رہے ہیں۔

کراچی میں چودہ الدعوۃ سکول ہیں جن میں تقریباً دو ہزار تین سو بچے زیر تعلیم ہیں۔

مختلف علاقوں میں قائم ان سکولوں کے طالب علم دوپہر کو کراچی پریس کلب کے باہر جمع ہوئے۔ ان کے ساتھ کچھ خواتین اور مرد موجود تھے۔

ایک خاتون ٹیچر شگفتہ طاہر نے بی بی سی کو بتایا کہ اسکولوں میں پولیس آرہی ہے جس کا اصرار ہے کہ بچوں اور اساتذہ کے نام بتائے جائیں ۔ ان کے بقول اس بنیاد پر تنگ کیا جارہا ہے تاکہ اسکول بند کر دیا جائے۔

ایک دوسری خاتون ٹیچر اقصٰی خان کا کہنا تھا کہ وہ قرآن ، حدیث اور اسلام کی تعلیم دیتی ہیں۔ انہوں نے بتایا کہ ان سکولوں میں صرف خواتین ٹیچرز پڑھاتی ہیں جو حجاب میں ہوتی ہیں۔ پرنسپل مرد ہوتے ہیں اور جب بھی کلاس میں آتے ہیں تو بتاکر آتے ہیں۔

میرا سکول اسلامی اسکول ہے جہاں اچھی تعلیم دی جاتی ہے، اسلامی طریقے سکھائے جاتے ہیں اور جہاد کے بارے میں بتایا جاتا ہے طالبعلم سعد الرحمان

تاہم مظاہرے میں شامل ایک طالب علم محمد سعد کا کہنا تھا کہ ان کے سکول میں جہاد کے بارے میں بتایا جاتا ہے۔

’میرا سکول اسلامی اسکول ہے جہاں اچھی تعلیم دی جاتی ہے، اسلامی طریقے سکھائے جاتے ہیں اور جہاد کے بارے میں بتایا جاتا ہے۔‘

نارتھ کراچی میں الدعوۃ سکول میں ساتویں کلاس میں زیر تعلیم سعد الرحمان کا کہنا ہے کہ انہیں اسکول میں انگریزی، اردو، سائنس، ریاضی، معاشرتی علوم کی تعلیم دی جاتی ہے۔ جب میں نے ان سے پوچھا کہ آپ کیا بننا چاہوگے تو اس نے مسکراتے ہوئے کہا ’مجاہد‘۔ اس کا کہنا تھا کہ مجاہد کے لیے اللہ نے بہت سارے انعامات رکھے ہیں۔

ساتویں جماعت میں زیر تعلیم محمد انس بھی مجاہد بننے کے خواہش مند ہیں کیونکہ یہ ان کے والد کی خوااہش ہے۔

ایک اور طالبعلم محمد ابراہیم نے کہا کہ وہ جہاد کے لیے کشمیر جانا چاہتے ہیں کیونکہ ’کشیمر ہمارا ہے اس پر کافر قبضہ کر رہے ہیں اس کے لیے جان بھی دے دیں گے۔‘