عبادالحق بی بی سی اردو ڈاٹ کام، لاہور

	احتجاج کرنے والے افراد دو درجن سے زائد ایمبولیسوں میں تھے

احتجاجی مظاہرے کا آغاز شہر کے وسط میں ناصر باغ سے ہوا۔ مظاہرین کی تعداد کا انداز اس سے لگایا جاسکتا ہے کہ احتجاج کرنے والے افراد دو درجن سے زائد ایمبولیسوں میں بیٹھے ہوئے تھے۔

مظاہزین نے احتجاجی پلے کارڈرز اٹھا رکھے تھے جن پر ’جماعۃ الدعوۃ دہشت گرد نہیں‘، ’بیرونی دباؤ پر رفاہی کاموں پر پابندی نامنظور‘ اور ’جماعۃ الدعوۃ پر پر پابندی ظلم و زیادتی‘ کی عبارتیں درج تھیں۔

ایمبولیسوں پر مشتمل یہ احتجاجی جلوس مال روڈ کے راستے پنجاب اسمبلی کے سامنے سے گزرا اور لاہور پریس کلب کے سامنے پہنچ گیا جہاں مظاہرین نے اجتجاج کیا اور تنظیم پر کارروائی کے خلاف نعرے لگائے۔

مظاہرے کے نیتجے میں ٹریفک میں کچھ وقت کے لیے جزوی طور پر خلل پیدا ہوگیا۔

مظاہرہ کی قیادت جماعۃ الدعوۃ کے خدمت خلق کے چئرمین عبدالروف کر رہے تھے اور ان کا کہنا ہے اس مظاہرے کا مقصد جماعۃ الدعوۃ کے خلاف کارروائیوں کی مذمت کرنا ہے۔ ان کے بقول حکومت کی تنظیم کے خلاف کارروائیوں سے وہ لوگوں متاثر ہوئے ہیں جن کی رفاہی کاموں کی وجہ سے دادرسی ہوتی ہے۔

عبدالروف نے کہا کہ آج اتنی بڑی تعداد میں لوگ متاثر ہو رہے ہیں لیکن انسانی حقوق کی تنظیمیں خاموش ہیں۔

مظاہرین پریس کلب کے سامنے احتجاج کرنے کے بعد پرامن طور پرمنتشر ہوگئے۔

ادھر الامین ٹرسٹ نامی ادارے کے ترجمان عبداللہ کا کہنا ہے کہ حکومت نے ان کے مراکز کے خلاف کارروائی کرتے ہوئے انہیں بھی سربمہر کردیا ہے۔