رفعت اللہ اورکزئی بی بی سی اردوڈاٹ کام، پشاور

	مقامی طالبان نے عید کے موقع پر فائر بندی کا اعلان کر رکھا ہے۔

سوات سے ملنے والی اطلاعات میں پولیس کے مطابق سنیچر کی شام صدر مقام مینگورہ کے علاقے مرغزار ٹاؤن میں نامعلوم مسلح افراد نے ایک گھر پر حملہ کیا جس میں چھ افراد ہلاک ہوگئے۔

ہلاک ہونے والوں میں دو بھائی اور چار خواتین شامل ہیں۔ واقعہ کی وجہ فوری طورپر معلوم نہیں ہوسکی۔ ابھی تک کسی نے اس واقعہ کی ذمہ داری قبول نہیں کی ہے۔

پولیس کے مطابق وتکے کے علاقے میں بھی چائے کا کاروبار کرنے والے دو افراد کو دو الگ الگ واقعات میں فائرنگ کرکے قتل کیا گیا ہے۔ اس واقعہ کی وجہ بھی فوری طورپر معلوم نہیں ہوسکی۔

ادھر فوجی حکام نے دعوی کیا ہے کہ سوات میں دو مختلف کارروائیوں میں تیرہ عسکریت پسند ہلاک اور متعدد زخمی ہوگئے ہیں۔ جھڑپوں میں ایک سکیورٹی اہلکار بھی ہلاک ہوگیا ہے۔

سوات میڈیا سینٹر سے جاری ہونے والے ایک بیان کے مطابق سنیچر کی شام سکیورٹی فورسز نے تحصیل مٹہ کے علاقے میں عسکریت پسندوں کے ٹھکانوں پر گولہ باری کی جس میں گیارہ عسکریت پسند ہلاک ہوگئے۔

بیان میں مزید کہا گیا ہے کہ مٹہ شہر میں بھی ایک اور کارروائی میں دو عسکریت پسند مارے گئے جبکہ عسکریت پسندوں کی جوابی کارروائی میں ایک سکیورٹی اہلکار بھی ہلاک ہوگیا ہے۔

سوات میں مقامی طالبان کے ترجمان حاجی مسلم خان نے حکومتی دعوؤں کی تردید کی ہے۔ انہوں نے جوابی دعوی کرتے ہوئے کہا کہ مٹہ میں جھڑپوں کے دوران گیارہ سکیورٹی اہلکار ہلاک ہوگئے ہیں۔

واضح رہے کہ جمعہ کو طالبان نے سوات میں عیدالاضحی کے احترام میں ایک ہفتے تک یکطرفہ جنگ بندی کا اعلان کیا تھا۔ تاہم طالبان ترجمان حاجی مسلم خان نے کہا تھا کہ اگر ان پر حملہ کیا گیا تو وہ اپنے دفاع میں حملے کا جواب دینگے۔