عبدالحئی کاکڑ بی بی سی اردوڈاٹ کام، پشاور

	سوات میں پولیس، فوج اور سیاسی اراکین کو نشانہ بنایا جا ررہا

مینگورہ پولیس سٹیشن کے ایس ایچ او خائستہ رحمن نے بی بی سی کو بتایا کہ اے این پی سے تعلق رکھنےوالے صوبہ سرحد کے وزیر جنگلات واجد علی خان کے چھوٹے بھائی فاروق خان کو سنیچر کی سہ پہراس وقت نامعلوم مسلح افراد نے گولیاں مار کر ہلاک کردیا جب وہ شاہ درہ بازار کی ایک دکان میں موجود تھے۔

ان کے بقول فاروق خان کو پستول سے سر میں گولیاں ماری گئی ہیں جس سے وہ موقع پر ہی ہلاک ہوگئے۔ان کے بقول حملہ آور جائے وقوعہ سے فرار ہونے میں کامیاب ہوگئے۔انکی لاش ورثا کے حوالے کر دی گئی ہے۔

فاروق خان کے خاندان کو کئی بار دھمکیاں بھی ملی ہیں۔طالبان کے ترجمان مسلم خان نے بی بی سی کو بتایا کہ انہیں بھی فاروق خان کی ہلاکت کی اطلاع پہنچی ہے تاہم وہ واقعہ کی تحقیقات کے بعد ہی اپنا ردعمل ظاہر کریں گے۔

دوسری طرف سکیورٹی فورسز نے ضلع سوات میں تحصیل کبل میں داخل ہوکر علاقے کا کنٹرول سنبھال لیا ہے۔طالبان نےچودہ دنوں کی شدید جھڑپوں کے بعد علاقے کو دو دن قبل خالی کر دیا تھا۔اسکے علاوہ طالبان ترجمان کا کہنا ہے کہ انہوں نے ننگولئی کے علاقے میں ایک شخص کو انتالیس کوڑے مار کر سزا دی ہے۔

ضلع سوات میں جاری فوجی کارروائی کے دوران سیاسی کارکنوں اور رہنماؤں کو ہدف بنا کر نشانہ بنانے کے واقعات میں اضافہ دیکھنے میں آیا ہے اور زیادہ تر حکمران قوم پرست جماعت عوامی نیشنل پارٹی کے رہنماؤں اور سرگرم کارکنوں کو نشانہ بنایا گیا ہے۔