دلاور خان وزیر بی بی سی اردو ڈاٹ کام، پشاور

	حکام کا دعوٰی ہے کہ ان کی ہلاکت ایک ’غلطی‘ کا نتیجہ تھی

مقامی صحافیوں کا کہنا ہے کہ صحافی قاری محمد شعیب کو سنیچر کی رات نو بجےگرین چوک کے قریب سکیورٹی فورسز نے اس قت فائرنگ کرکے ہلاک کر دیا جب وہ ہسپتال سے واپس گھر لوٹ رہے تھے۔صحافیوں کے مطابق ہسپتال میں ان کی بیٹی کا آپریشن ہوا تھا۔

سوات پریس کلب کے جنرل سیکٹری فضل رحیم نے بی بی سی سے بات کرتے ہوئے الزام لگایا کہ سکیورٹی فورسز نے جان بوجھ کرصحافی کو نشانہ بنایا ہے۔انہوں نے کہا کہ یہ واقعہ رات نو بجے کے قریب پیش آیا ہے اور علاقے میں کسی قسم کا کرفیوں نہیں تھا۔انہوں نے کہا کہ سکیورٹی فورسز کی فائرنگ کے دوران دوسری گاڑیاں بھی اسی راستے سےگزر رہی تھیں۔

دوسری طرف حکام کا دعوٰی ہے کہ یہ ہلاکت غلطی سے ہوئی ہے صحافی کیساتھ کسی کی دشمنی نہیں تھی حکام کے مطابق علاقے میں سکیورٹی کی نازک صورتحال کی وجہ سے سکیورٹی اہلکار رات کو آنے جانے والوں پرگہری نظر رکھتے ہیں اور اس قسم کے واقعہ کا خطرہ رہتا ہے۔

سوات پریس کے جوائنٹ سیکٹری شرین ذادہ نے بتایا کہ سوات میں صحافی احتجاج کر رہے ہیں۔ قاری محمد شیعب کی ہلاکت پر صحافیوں کو زبردست دھچکا پہنچا ہے۔انہوں نے کہا کہ آزاد صحافت پر قدغن برداشت نہیں کریں گے۔

قاری شیعب کے وارثوں میں تین بیٹیاں ایک بیٹا اور دو بیویاں ہیں۔مقامی لوگوں کے مطابق وہ اپنے اہل خانہ کے واحد ذریعہ معاش تھے۔

قاری محمد شعیب مقامی اخبار روز نامہ آزادی اور پی پی اے کے ساتھ منسلک تھے اور سوات کے صحافی اس واقعہ پر انتہائی مشتعل ہیں۔سوات میں جب سے فوجی کارروائی شروع ہوئی ہے اس کے بعد سے یہ دوسرا صحافی ہے جو اس طرح کے تشدد میں ہلاک ہوا ہے۔اس سے پہلے ایک صحافی ایک پولیس افسر کی نمازہ جنازہ پر خودکش حملے کے دوران ہلاک ہوگیا تھا۔