دلاور خان وزیر بی بی سی اردو ڈاٹ کام، پشاور

	حکام کا دعوٰی ہے کہ ان کی ہلاکت ایک ’غلطی‘ کا نتیجہ تھی

مقامی اخبار سے وابستہ محمد شعیب نامی صحافی گذشتہ سنیچر کو پاکستان کے صوبہ سرحد میں وادی سوات کے شہر مینگورہ میں کرفیو کے دوران سکیورٹی فورسز کی فائرنگ کا نشانہ بن گئے تھے۔

سکیورٹی فورسز نے اس ہلاک کو ایک ’غلطی‘ قرار دیا تھا تاہم سوات پریس کلب کے جنرل سیکٹری فضل رحیم نے بی بی سی سے بات کرتے ہوئے الزام لگایا تھا کہ سکیورٹی فورسز نے جان بوجھ کرصحافی کو نشانہ بنایا ہے۔

سی پی جے کے بوب زیئیٹ نے کہا ہے کہ’ہم (سی پی جے ) صحافی محمد شعیب کی افسوسناک ہلاکت پر ان کے اہلخانہ اور ساتھی صحافیوں سے تعزیت اور گہرے رنج کا اظہار کرتے ہیں‘۔ سی پی جے نے یہ بھی کہا ہے کہ وادي سوات میں صحافیوں کو فرض کی ادائیگی کے دوران سخت خطرات درپیش ہیں۔

یاد رہے کہ سوات میں حالیہ آپریشن کے دوران مختلف واقعات میں کم از کم تین صحافی مارے جا چکے ہیں۔

محمد شعیب کی ہلاکت سے قبل اگست میں روزنامہ ’آزادی‘ کے ہی ایک اور صحافی عبدالعزیز شاہین کو طالبان عسکریت پسندوں نے اغوا کیا تھا اور وہ طالبان ٹھکانوں پر پاکستانی فوج کے ہوائي حملے میں ہلاک ہوگئے تھے جبکہ اس سے پہلے ایک صحافی ایک پولیس افسر کی نمازہ جنازہ پر خودکش حملے کے دوران ہلاک ہوگیا تھا۔