ریاض سہیل بی بی سی اردو ڈاٹ کام، کراچی

	عمارت کی چھت جگہ جگہ سے ٹوٹ چکی ہے اور اس سے ملبہ گرتا رہتا ہے

وہ سینٹ زیوئر سکول میں پانچویں کلاس میں زیر تعلیم ہے، شہر کے مرکزی علاقے صدر، لکی سٹار پر واقعے یہ سکول تیرہ کمروں پر مشتمل ہے، جس میں صبح اور شام کی دو شفٹوں میں چار سکول چلتے ہیں۔ جو چار سو طلبہ اور چالیس اساتذہ پر مشتمل ہیں۔

قیام پاکستان سے قبل یعنی انیس سو اکتالیس میں کیتھولک کرسچن کمیونٹی نے اس سکول کی بنیاد ڈالی گئی تھی، جو انیس سو بہّتر تک ہسپانوی رومن کیتھولک سینٹ زیوئر سوسائیٹی کے زیر اہتمام جاری تھا مگر ذوالفقار علی بھٹو کے دور حکومت میں دیگر تعلیمی اداروں کے ساتھ اسے بھی قومی ملکیت میں لے لیا گیا۔

دس سال قبل تک اس عمارت میں صرف ایک ہی سکول دو شفٹوں میں جاری تھا مگر بعد میں اسی علاقے میں موجود کچھی میمن گورنمنٹ پرائمری سکول کو عمارت بوسیدہ ہونے کی وجہ سے یہاں منتقل کر دیا گیا اور آٹھ سال قبل ایک اور سکول حسنی پرائمری سکول کو بھی زبردستی یہاں متقل کردیا گیا اور اس کی جگہ ایک عمارت کھڑی کر دی گئی۔

ایک سکول میں چار سکول سمٹا گئے مگر عمارت کی نہ کبھی بھی مرمت ہوسکی اور نہ ہی بنیادی سہولتوں میں اضافہ کیا گیا۔

سکول کے ہیڈ ماسٹر کا کہنا ہے کہ گیارہ سال قبل سکول کی بجلی منقطع کردی گئی تھی جو آج تک بحال نہیں ہوسکی ہے، اور اب کنڈے کے ذریعے آتی ہے۔

	شہر کے مرکزی علاقے صدر، لکی سٹار پر واقعے یہ سکول تیرہ کمروں پر مشتمل ہے،

بجلی کا معاملہ ابھی حل ہی نہیں ہوا تھا کہ چار ماہ قبل روڈ کی کھدائی کے بعد سکول میں پانی کی فراہمی بھی منقطع ہوگئی۔ خاتون ٹیچر مس محمودہ کا کہنا ہے کہ پانی کا بہت بڑا مسئلہ ہے بچوں کے پینے تک کے لیے پانی نہیں ہے۔

سکول کے کمروں میں کھڑکیوں کے پٹ کب کے ٹوٹ چکے ہیں، جس وجہ سے گرمی میں لو اور سردی میں ٹھنڈی ہوائیں بغیر کسی روک ٹوک کے اندر آتی جاتی ہیں۔ بلیک بورڈ کےم لیے دیوار پر سیاہ رنگ لگا دیا گیا، دیواروں پر ٹیوب لائٹس کی پٹیاں تو لگی ہوئی ہیں مگر ان میں ٹیوبز نہیں ہیں۔

عمارت کی چھت جگہ جگہ سے ٹوٹ چکی ہے اور اس سے ملبہ گرتا رہتا ہے، سکول کے چپڑاسی محمد رفیق کا کہنا ہے کہ پچھلے سال ملبہ گرنے سے ایک ٹیچر اور چار بچے زخمی بھی ہوچکے ہیں، سکول انتظامیہ نے کئی بار شکایات کی ہیں مگر کوئی سننے والا ہی نہیں ہے۔

	سکول کی عمارت کے ساتھ کا ایک پلاٹ خالی ہے۔ جس پر کچرے کے ڈھیر لگے ہیں

پانچویں کلاس میں زیر تعلیم آفرین انصارالدین کا کہنا ہے کہ گرد دھول سے بچ بچ کر صفائی کرتےہیں مگر پھر بھی یونیفارم خراب ہوجاتی ہے۔

سکول کی عمارت کے ساتھ کا ایک پلاٹ خالی ہے۔ جس پر کچرے کے ڈھیر لگے ہیں، چپڑاسی کا کہنا ہے کہ جب کچرا جلایا جاتا ہے تو پورا دھواں سکول کے اندر آجاتا ہے جس وجہ سے جلد چھٹی کرنی پڑتی ہے۔ کیونکہ بچے سانس تک نہیں لے سکتے اتنا دہوان بڑہ جاتا ہے۔

ہیڈ ماسٹر کا کہنا ہے کہ اس سکول پر کبھی توجہ نہیں دی گئی اس وقت جو کچھ بہتر حالت نظر آ رہی ہے وہ بھی این جی اوز کی مدد سے لائی گئی ہے محکمہ تعلیم کی طرف سے کوئی توجہ نہیں دی جا رہی ہے۔ کہتے ہیں فنڈز نہیں ہیں۔