عبدالحئی کاکڑ بی بی سی اردو ڈاٹ کام، پشاور

	سوات میں پہلے بھی پولیس اہلکار خودکش حملوں کا نشانہ بنے ہیں

ایک سکیورٹی اہلکار نے بی بی سی کو بتایا کہ جمعرات کی رات تقریباً نو بجے گاڑی میں سوار ایک خودکش بمبار نے صدر مقام مینگورہ سے تقریباً دو کلومیٹر دور واقع ایک چیک پوسٹ کے ساتھ گاڑی ٹکرائی ہے۔ ان کے بقول حملے میں دو اہلکار ہلاک جبکہ پانچ زخمی ہوگئے ہیں۔

حملے کے بعد سکیورٹی فورسز نے اندھادھند ہوائی فائرنگ شروع کی جو آخری اطلاعات ملنے تک جاری تھی اور اس وقت تک کسی نے بھی اس واقعے کی ذمہ داری قبول نہیں کی تھی۔اس سے قبل ہونے والے خودکش حملوں کی ذمہ داری وہاں پر سکیورٹی فورسز کے ساتھ برسرِ پیکار مسلح طالبان قبول کرتے رہے ہیں۔

مبینہ خودکش بمبار نے جس کئی منزلہ عمارت کو نشانہ بنایا ہے اس میں سکیورٹی فورسز کے درجنوں اہلکار تعینات تھے۔