ہارون رشید بی بی سی اردو ڈاٹ کام، اسلام آباد

	امریکی سفیر کو سینٹ میں متفقہ طور پر منظور کی جانے مذمتی قرار داد بھی حوالے کی گئی

ڈرون حملوں پر سینیٹ کی مذمت

وزیرستان: ڈرون حملے میں بیس ہلاک

وزارت خارجہ کی جانب سے جاری کیے گئے ایک مختصر بیان میں بتایا گیا ہے کہ امریکی سفیر این ڈبلیو پیٹرسن پر واضح کیا گیا کہ پاکستان ان میزائل حملوں میں جانی اور مالی نقصان کی شدید مذمت کرتا ہے۔

انہیں بتایا گیا کہ یہ حملے پاکستان کی سالمیت اور خودمختاری کی خلاف ورزی ہے اور انہیں فوری طور پر بند کیا جائے۔ بیان میں بتایا گیا کہ امریکی سفیر پر یہ بھی واضح کیا گیا کہ یہ حملے حکومت کی دہشت گردی کے خلاف کوششوں کے لیے عوامی حمایت کو متاثر کر سکتے ہیں۔

حملوں کے خلاف پاکستان کے ایوان بالا یا سینٹ میں متفقہ طور پر منظور کی جانے والی مذمتی قرار داد بھی امریکی سفیر کے حوالے کی گئی۔

ماضی میں بھی پاکستان امریکہ سے اس قسم کے حملوں پر باضابطہ احتجاج کر چکا ہے لیکن بظاہر امریکی حملوں کی شدت میں کوئی کمی نہیں آئی ہے۔

حالیہ احتجاج سینیٹ میں گزشتہ پیر منظور کی جانے والی مذمتی قرار داد کی وجہ سے ہوا ہے۔ قائد ایوان رضا ربانی کی جانب سے پیش کی گئی اس قرار داد میں حکومت سے احتجاج کا مطالبہ کیا گیا تھا۔ قرار داد ایوان کی معمول کی کارروائی معطل کر کے پیش کی گئی تھی۔

یاد رہے کہ تازہ ترین حملہ قبائلی علاقے جنوبی وزیرستان میں ہوا تھا جس میں بیس افراد ہلاک ہوئے تھے۔