رفعت اللہ اورکزئی بی بی سی اردو ڈاٹ کام، پشاور

	مغوی پولیس اہلکار طالبان کی تحویل میں

انہیں گلہ کاٹ کر ہلاک کیا گیا ہے۔ طالبان نے پولیس اہلکار کی ہلاکت کی ذمہ داری قبول کرلی ہے۔

مذکورہ پولیس اہلکار کے ایک بھائی کو بھی تقربناً ایک سال پہلے طالبان نے گلہ کاٹ کر قتل کیا تھا۔

سوات پولیس کے ایک اہلکار نے بی بی سی کو بتایا کہ جمعرات کی صبح چار باغ کے علاقے سے فرنٹیر ریزر پولیس کے ہیڈ کانسٹیبل بخت علی کی لاش ملی ہے جنہیں گلہ کاٹ کر ہلاک کیاگیا ہے۔

انہوں نے کہا کہ مذکورہ اہلکار گزشتہ روز کبل کے علاقے سرسینڑی میں مقامی عسکریت پسندوں اور سکیورٹی فورسز کے درمیان ہونے والی لڑائی کے دوران ایف سی اہلکاروں سمیت لاپتہ ہوگئے تھے۔ اس جھڑپ میں اٹھارہ ایف سی اہلکار بھی لاپتہ ہوگئے تھے جو بدستور لاپتہ ہیں۔

اہلکار کے مطابق ہلاک کیے جانے والے پولیس اہلکار کے ایک اور بھائی سرور علی بھی پولیس ڈیپارٹمینٹ میں ملازم تھے اور انہیں بھی مٹہ تحصیل میں طالبان نے گلہ کاٹ کر ہلاک کیا تھا۔

سوات میں طالبان کے ترجمان حاجی مسلم خان نے پولیس اہلکار کی ہلاکت کی ذمہ داری قبول کی ہے۔ انہوں نے گزشتہ روز کہا تھا کہ سکیورٹی اہلکاروں سے لڑائی کے دوران ایک پولیس اہلکار کو زندہ حراست میں لیا گیا ہے۔

واضح رہے کہ گزشتہ روز تحصیل کبل کے علاقے سرسینڑی میں مسلح طالبان نے سکیورٹی فورسز کے ایک قافلے پر حملہ کیا تھا جس میں پانچ سکیورٹی اہلکار ہلاک ہوگئے تھے۔ سکیورٹی اہلکاروں کے جوابی حملے میں پانچ عسکریت پسند بھی مارے گئے تھے۔