عزیزاللہ خان بی بی سی اردو ڈاٹ کام، کوئٹہ

	بلوچستان میں امن و امان کی صورت حال خراب ہوتی جا رہی ہے

اس تصادم میں پتھراؤ اورلاٹھیوں کے استعمال کے علاوہ شدید فائرنگ کی گئی ہے جس سے متعدد طلبہ شدید زخمی ہو گئے۔

کوئٹہ کے پولیس افسر محمد اکبر ارائیں نے بتایا ہے کہ شام کے وقت طلبا بلوچستان اور فاٹا کے لیے وفاقی حکومت کی جانب سے وظائف کے لیے منعقدہ نیشنل ٹیسٹ سروس کے لیے آئے تھے کہ اس دوران ایک گروہ نے اس ٹیسٹ کے لیے ضلعی کوٹے کا مطالبہ کر دیا جس پر دوسرا گروہ متفق نہیں ہوا۔ پولیس کے مطابق ایک طرف بلوچ طلبا اور دوسری جانب پشتون طلبا تھے۔

عینی شاہدین نے بتایا ہے کہ ایک طرف سے شدید فائرنگ کی گئی ہے جس سے کئی طالبعلموں کو گولیاں لگی ہیں۔ پولیس نے علاقے کو گھیرے میں لے کر حملہ آوروں کو منتشر کر دیا اور ہاسٹل کو سیل کر دیا ہے تاہم کسی گرفتاری کی اطلاع نہیں ہے۔

اس واقعہ کے بعد کوئٹہ میں بولان میڈیکل کمپلیکس اور خضدار انجینیئرنگ یونیورسٹی میں کشیدگی بڑھ گئی ہے۔