عزیزاللہ خان بی بی سی اردو ڈاٹ کام، کوئٹہ

	کوئٹہ شہر میں سخت حفاظتی انتظامات کیے گئے ہیں

پولیس حکام نے بتایا ہے کہ دھماکے کے بعد کوئٹہ داخلی اور خارجی راستوں پر سخت چیکنگ کی جا رہی ہے، حساس مقامات پر تعینات نفری کو بڑھا دیا گیا ہے جبکہ تجارتی اور کاروباری مراکز کے اردگرد چوکیاں قائم کی گئی ہیں اور ان مراکز کے اندر سادہ کپڑوں میں اہلکار موجود ہیں۔

پولیس ذرائع نے بتایا ہے کہ گزشتہ روز خودکش دھماکے کے حوالے سے قریباً ایک درجن افراد کو حراست میں لیا گیا ہے جن میں اس مدرسے کے طالبعلم بھی شامل ہیں جہاں گزشتہ جمعہ کو دھماکہ ہوا تھا۔ پولیس کے مطابق پوچھ گچھ کے بعد بے گناہ افراد کو رہا کر دیا جائے گا۔

یاد رہے بدھ کی دوپہر ایک نوجوان نے مبینہ طور پر اپنے آپ کو کوئٹہ چھاؤنی کی داخلی چوکی پر فرنٹیئر کور کی گاڑیوں کے پاس دھماکے سے اڑا دیا تھا جس میں پولیس کے مطابق ایک طالبہ ہلاک اور تیرہ سکیورٹی اہلکاروں سمیت بائیس افراد زخمی ہوگئے تھے۔ ایسی اطلاعات ہیں کہ اس دھماکے میں ایف سی کے تین اہلکار ہلاک ہوئے ہیں لیکن سرکاری سطح پر اس کی تصدیق نہیں کی جا رہی۔

یاد رہے گزشتہ جمعہ کو اسی سڑک پر بلیلی کے قریب ایک مدرسے میں دھماکہ ہوا تھا جس میں طالبعلموں اور اساتذہ سمیت کم سے کم چھ افراد ہلاک اور بارہ زخمی ہوگئے تھے۔