عبدالحئی کاکڑ بی بی سی اردوڈاٹ کام، پشاور

	پاکستان کی فوج کو قبائلی علاقوں میں بہت جانی نقصان اٹھانا پڑا ہے

پاکستانی فوج کے ایک ترجمان میجر مراد خان نے بی بی سی کو بتایا کہ سنیچر کی صبح ایک فوجی قافلہ شمالی وزیرستان کے صدر مقام میرانشاہ سے بنوں جارہا تھا کہ عشاء اور قمبر کے درمیانی علاقے میں ایک مبینہ خودکش بمبار نے بارود سے بھری گاڑی سکیورٹی فورسز کی ایک گاڑی سےٹکرا دی۔

ان کے بقول حملے میں تین فوجی اہلکار اور تین عام شہری ہلاک ہو گئے ہیں۔ انہوں نے کہہ کے اس کے علاوہ اس حملے میں پانچ فوجی زخمی بھی ہوئے ہیں۔

تاہم پولٹیکل انتظامیہ کے ایک اہلکار نے بی بی سی کو بتایا کہ اس واقعہ میں چار اہلکار ہلاک اور تین شہری ہلاک ہوئے ہیں۔ جبکہ زخمی ہونے والے عام شہریوں کی تعداد انہوں نے بارہ بتائی ہے۔

مقامی لوگوں کا کہنا ہے کہ مرنے والے اہلکاروں کی تعداد زیادہ ہوسکتی ہے کیونکہ جس گاڑی کو نشانہ بنایا گیا ہے اس میں پندرہ سے زائد اہلکار سوار تھے۔

انہوں نے مزید کہا کہ حملے کے فوراً بعد سکیورٹی فورسز نے شدید فائرنگ کی جس کے بعد انہوں نے علاقے کو محاصرے میں لے لیا۔

اگرچہ شمالی وزیرستان میں حکومت اور مقامی طالبان کے درمیان امن معادہدہ موجود ہے لیکن حالیہ دنوں میں علاقے میں سرحد پار سے ہونے والے مبینہ امریکی میزائل حملوں میں اضافہ کے بعد عسکریت پسندوں میں غم و غصہ بڑھ گیا ہے۔ انہوں نے کچھ عرصے سے دوبارہ سکیورٹی فورسز پر حملے شروع کردیئے ہیں۔البتہ اس تازہ مبینہ خودکش حملے کی ذمہ داری طالبان نے ابھی تک قبول نہیں کی ہے۔