اعجاز مہر بی بی سی اردو ڈاٹ کام، اسلام آباد

	پاکستانی حدود میں امریکی فوجی کارروائیوں میں اضافہ ہوا ہے

یہ بات انہوں نے جمعرات کو اسلام آباد میں زیرو پوائنٹ پر انٹر چینج کا سنگ بنیاد رکھنے کے موقع پر صحافیوں سے بات کرتے ہوئے کہی۔

اس سے قبل جمعرات کو امریکی اخبار نیو یارک ٹائمز نے دعوی کیا تھا کہ صدر جارج بش نے جولائي میں امریکی خصوصی فورسز کو پاکستان کی حدود میں القاعدہ اور طالبان کے خلاف پاکستانی حکومت کی پیشگی منظوری کے بغیر زمینی کارروائياں کرنے کی منظوری دے دی تھی۔

’غیر ملکی فوج حملہ نہیں کر سکتی‘

وزیراعظم نے چیف آف آرمی سٹاف جنرل اشفاق پرویز کیانی کے اس بیان کی مکمل تائید کی جس میں انہوں نے کہا ہے کہ افواج پاکستان ملک کی سرحدوں کا بھرپور دفاع کریں گی اور کسی غیر ملکی فوج کو پاکستان میں کارروائی کی اجازت نہیں دی جائے گی۔

آرمی چیف کا یہ بیان اس وقت سامنے آیا ہے جب امریکہ کے چیئرمین جائنٹ چیفس آف سٹاف کمیٹی مائیک مولن نے امریکی کانگریس کی ایک کمیٹی کے سامنے بیان دیا کہ امریکہ طالبان سے متعلق اپنی حکمتِ عملی تبدیل کر رہا ہے جس کے تحت اب سرحد پار کر کے پاکستان کے اندر طالبان پر بھی حملے ہو سکتے ہیں۔

فوج کےترجمان میجر جنرل اطہر عباس نے بی بی سی اردو کو بتایا کہ اگر پاکستانی سرحدوں کی دوبارہ خلاف ورزی ہوئی تو ’پاکستانی فوج جوابی کارروائی کا حق محفوظ رکھتی ہے۔‘ لیکن انہوں نے کہا کہ اس جوابی کارروائی کی نوعیت کیا ہوگی اس کا انحصار خلاف ورزی کی نوعیت پر ہوگا۔

میجر جنرل اطہر عباس نے کہا کہ اتحادی فوج کو اس فیصلے سے آگاہ کر دیا گیا ہے۔

نیویارک ٹائمز کی رپورٹ کے مطابق ایک سے زیادہ مختلف سینیئر امریکی عملداروں نےصدر بش کے اس خفیہ حکم کی منظوری کی تصدیق کی ہے کہ بش انتظامیہ میں مہینوں تک بحث کے بعد صدر بش نے امریکی خصوصی فورسز کو پاکستان کے اندر زمینی کارروائیاں کرنے کی خفیہ طور پر منظوری دی ہے۔

امریکی افواج نےگزشتہ چند ہفتوں میں کئی مرتبہ پاکستانی حدود کے اندر کارروائی کی ہے جس کے نتیجے میں مبینہ طور پر عام شہری بھی ہلاک ہوئے ہیں۔