 | | | | | | | |||||||||||||||||||||||||||||||||||
| | ||||||||||||||||||||||||||||||||||||||||
|
’خلیج گوانتانامو: کوائف اکٹھے کر رہے ہیں‘ | ||||||||||||||||||||||||||||||||||||||||
پاکستان کے وزیر خارجہ شاہ محمود قریشی نے قومی اسمبلی کو بتایا ہے کہ حکومت گوانتانامو بے میں قید پاکستانیوں کی تعداد اور کوائف کے بارے میں تفصیلات جمع کر رہی ہے اور ایوان کس اس کے بارے میں آگاہ کیا جائے گا۔ انہوں نے یہ بات جمعہ کو قومی اسمبلی کے اجلاس کے دوران مسلم لیگ نون سے تعلق رکھنے والے رکن قومی اسمبلی انجینئر خرم دستگیر خان کے تحریری سوال کے جواب میں بتائی۔ انہوں نے خلیج گوانتانامو کے جیل خانے میں قید پاکستانیوں کی کل تعداد، نام، پتے، عرصہ حراست اور ان افراد کو قانونی امداد فراہم کرنے کے لئے کیے گئے اقدامات کے بارے میں پوچھا تھا۔ وزیر خارجہ نے اس کے جواب میں ایوان کو صرف اتنا بتایا کہ کیوبا میں قائم امریکی قید خانے میں موجود پاکستانیوں کے بارے میں مطلوبہ معلومات واشنگٹن ڈی سی میں واقع پاکستان کے سفارتخانے سے اکٹھی کی جارہی ہیں اور موصول ہوتے ہی ایوان کے سامنے پیش کر دی جائیں گی۔
چند روز قبل خارجہ امور کے بارے میں سینیٹ کی قائمہ کمیٹی کے اجلاس میں بتایا گیا تھا کہ خلیج گوانتانامو کے حراستی مرکز میں اس وقت سات پاکستانی قید ہیں جن تک رسائی کے سلسلے میں کمیٹی کے چئرمین مشاہد حسین سید کی سربراہی میں ایک وفد اس مہینے امریکہ کا دورہ کرے گا۔ قومی اسمبلی کو ایک اور سوال کے جواب میں وزیر بہبود آبادی نے اپنے تحریری جواب میں بتایا کہ پاکستان میں آبادی میں اضافے کی شرح ماضی کے مقابلے میں کم ہوئی ہے۔ انہوں نے بتایا کہ آبادی کی شرح جو 70 اور 80 کی دہائی میں تین فیصد سالانہ کے تناسب سے تاریخ کی بلند ترین شرح تھی اب کم ہوکر 8ء1 فیصد ہوگئی ہے۔ ’نیشنل انسٹی ٹیوٹ آف پاپولیشن اسٹڈیز کی نومبر 2006ء کی رپورٹ کے مطابق آبادی میں اضافے کی شرح سال 2007-2006 میں 9ء1 فیصد تھی اور 2008-2007 کے معاشی جائزے کے مطابق یہ کم ہوکر 8ء1 رہ گئی ہے۔‘ وفاقی وزیر نے بتایا کہ پاکستان ڈیموگرافک اور ہیلتھ سروے2007ء کے مطابق عالمی سطح پر لوگوں میں شعور بیدار ہوا ہے اور 97 فیصد آبادی کو خاندانی منصوبہ بندی کے بارے میں آگاہی حاصل ہے۔
پیپلز پارٹی کی رکن قومی اسمبلی فوزیہ وہاب کے ایک سوال کے جواب میں وزیر صحت شیری رحمن نے بتایا کہ پاکستان میں انسانی آبادی میں بڑے پیمانے پر برڈ فلو کے پھیلنے کا کوئی خطرہ نہیں ہے۔ وزیر خوراک، زراعت اور لائیو اسٹاک نذر محمد گوندل نے ایوان کو بتایا کہ ملک میں ایوین انفلوئنزا کے پھوٹنے کی اطلاع آخری بار اس سال 17 جون کو صوابی کے ایک مرغی فارم کے بارے میں ملی تھی اور 2008-2007 کے دوران ملک میں مجموعی طور پر 22 مرتبہ برڈ فلو کا مرض پھوٹنے کی تصدیق کی گئی۔ انہوں نے بتایا کہ وفاقی حکومت اور چاروں صوبائی حکومتیں مسلسل صورتحال پر نظر رکھے ہوئے ہیں اور برڈ فلو کی تشخیص اور پھیلاؤ کو روکنے کے لئے ضروری انتظامات کیے گئے ہیں۔
نذر محمد گوندل نے ایوان کو بتایا کہ اسکی ایک وجہ ڈیزل کی قیمت میں اضافہ اور شدید بارشیں تھیں۔ وزیر ریلوے نے ایوان کو بتایا کہ سابق وزیر اعظم بے نظیر بھٹو کے قتل کے بعد صوبہ سندھ میں ہونےوالے ہنگاموں کے دوران نذر آتش ہونے والے 61 ریلوے اسٹیشنوں کی بحالی کے لئے پی سی ون کی منظوری دیدی گئی ہے اور اس پر رواں مالی سال میں کام شروع ہوجائے گا جس کے لئے سات کروڑ بیالیس لاکھ روپے کی رقم مختص کی گئی ہے۔ وزیر خارجہ نے بتایا کہ صدر پرویز مشرف نے اقتدار میں آنے کے بعد صرف ڈیڑھ سال کے اندر غیرملکی دوروں پر ساڑھے تیس کروڑ روپے سے زائد رقم خرچ کی۔ حنیف عباسی نے سوال کیا تھا کہ پندرہ اکتوبر انیس سو ننانوے سے اکتیس دسمبر دو ہزار دو کے دوران صدر مملکت کن کن ممالک کا دورہ کیا اور ان پر کتنی رقم خرچ ہوئی۔ وزیر خارجہ نے تحریری طور پر ایوان کو بتایا کہ سابق صدر محمد رفیق تارڑ نے اپنی مدت صدارت کے دوران بیرون ملک کوئی سرکاری دورہ نہیں کیا۔ البتہ پرویز مشرف نے اقتدار سنبھالنے کے بعد ڈیڑھ سال کے اندر امریکہ، بھارت، برطانیہ، فرانس، ترکی، سعودی عرب اور چین سمیت پندرہ ممالک کے دورے کئے۔ جن میں سب سے زیادہ رقم امریکہ اور برطانیہ کے دوروں پر خرچ ہوئی جو پندرہ کروڑ روپے سے زائد بنتی ہے۔ |  اسی بارے میں  قومی اسمبلی میں مذہبی جذبات کا اظہار16 April, 2008 | پاکستان قومی اسمبلی میں بلدیات نظام 04 June, 2008 | پاکستان اسمبلی کی کارروائی ’ویب‘ پر 04 June, 2008 | پاکستان ’دفاعی بجٹ کا خاکہ اسمبلی میں‘09 June, 2008 | پاکستان قومی اسمبلی سے مالیاتی بل منظور22 June, 2008 | پاکستان ’اسمبلی توڑنے کا کوئی جواز نہیں‘09 August, 2008 | پاکستان قومی اسمبلی، کشمیر کمیٹی تشکیل19 August, 2008 | پاکستان | ||||||||||||||||||||||||||||||||||||||||
| |||||||||||||||||||||||||||||||||||||||||
| |||||||||||||||||||||||||||||||||||||||||
پاکستان میں آبادی میں اضافے کی شرح ماضی کے مقابلے میں کم ہوئی ہے۔ انہوں نے بتایا کہ آبادی کی شرح جو 70 اور 80 کی دہائی میں تین فیصد سالانہ کے تناسب سے تاریخ کی بلند ترین شرح تھی اب کم ہوکر 8ء1 فیصد ہوگئی ہے
