عبدالحئی کاکڑ بی بی سی اردوڈاٹ کام، پشاور

	پولیس سٹیشن پر حملے کے وقت تھانے کی اندر تیس پولیس اہلکار موجود تھے

پاکستانی فوج کے مطابق سنیچر کے روز سوات میں ہونے والی لڑائی کے دوران چالیس سے پینتالیس طالبان مارے گئے ہیں جبکہ گیارہ سکیورٹی اہلکار ہلاک اور سات زخمی بھی ہوئے ہیں۔

فوج کے ایک ترجمان نے سات سکیورٹی اہلکاروں کی ہلاکت کی تصدیق کی ہے اور بتایا ہے کہ سکیورٹی فورسز کی تین گاڑیوں کو نقصان پہنچا ہے۔

اس سے قبل سوات میں حکام نے بتایا تھا کہ تیس طالبان مارے گئے ہیں۔ طالبان نے حکومتی دعوے کو رد کرتے ہوئے بیس اہلکاروں کے ہلاکت کا جوابی دعویٰ کیا ہے۔

پولیس چوکی پر دھماکہ، چھ ہلاکتیں
سوات میں ایک اور واقعے میں چہار باغ پولیس سٹیشن کو خود کش حملے اور ایک اور پولیس چوکی کو بم سے اڑایا گیا ہے جس میں مجموعی طور پر دو پولیس اہلکاروں سمیت چھ افراد کی ہلاکت کی اطلاعات ہیں۔طالبان نےان واقعات کی ذمہ داری قبول کرلی۔

سوات میڈیا سنٹر کے ترجمان میجر ناصر علی نے بی بی سی کو بتایا کہ سنیچر کی صبح سکیورٹی فورسز نے کانجو اور تحصیل کبل میں کرفیو نافذ کرکے طالبان کے خلاف بھرپور کاروائی شروع کی ہے۔

بری کوٹ میں تشدد  سنیچر کی صبح پولیس کی ایک خالی چوکی کو دھماکہ خیز مواد سے اڑایا گیا ہے جس کے قریب گزرنے والے دو بچے ہلاک جبکہ تین زخمی ہوگئے ہیں۔ پولیس نے مزید کہا کہ تحصیل کبل کے ڈیرو کے علاقے میں گھر پر مارٹر گولہ گرنے کے ایک اور واقعہ میں ایک بچہ ہلاک اور چھ دیگر افراد زخمی ہوگئے ہیں

انہوں نے گزشتہ رات تحصیل مٹہ میں طالبان کے ایک ’غیر قانونی‘ ایف ایم اسٹیشن کو بھی تباہ کرنے کا دعویٰ کیا۔ اس سلسلے میں جب طالبان ترجمان مسلم خان سے رابطہ کیا گیا تو انہوں نے اپنے ساتھیوں کے مارے جانے کی حکومتی دعوے کی تردید کرتے ہوئے بیس اہلکاروں کی ہلاکت کا جوابی دعویٰ کیا۔ انہوں نے کہا کہ جھڑپ میں ان کا محض ایک ساتھی زخمی ہوا ہے۔

خودکش حملہ، ہلاکتیں
دوسری طرف سوات ہی میں پولیس کا کہنا ہے کہ سنیچر کی صبح بارود سے بھری ایک جیپ میں سوار خودکش حملہ آور نے چہار باغ پولیس اسٹیشن پر حملہ کیا جس میں ان کے بقول دو اہلکار ہلاک جبکہ نو زخمی ہوگئے ہیں۔

تاہم سیدو شریف ہسپتال کے ایک اہلکار عمر طارق نے بی بی سی کو بتایا کہ ہسپتال میں اس واقعے میں ہلاک ہونے والے دو اہلکاروں اور دو شہریوں سمیت چار افراد کی لاشیں اور گیارہ اہلکاروں اور بارہ عام شہریوں سمیت تئیس زخمی لائے گئے ہیں۔

انہوں نے مزید بتایا کہ چہار باغ کے دھماکے میں زخمی ہونے والوں کے بشمول سوات میں گزشتہ شب ہونے والے مختلف واقعات میں زخمی ہونے والے سینتیس افراد ہسپتال میں زیر علاج ہیں۔

سوات کے تحصیل بری کوٹ کے علاقے ابوحہ میں بھی پولیس کے مطابق سنیچر کی صبح پولیس کی ایک خالی چوکی کو دھماکہ خیز مواد سے اڑایا گیا ہے جس کے قریب گزرنے والے دو بچے ہلاک جبکہ تین زخمی ہوگئے ہیں۔ پولیس نے مزید کہا کہ تحصیل کبل کے ڈیرو کے علاقے میں گھر پر مارٹر گولہ گرنے کے ایک اور واقعہ میں ایک بچہ ہلاک اور چھ دیگر افراد زخمی ہوگئے ہیں۔

طالبان کے ترجمان مسلم خان نے چہار باغ پولیس سٹیشن پر خود کش حملے اور ابوحہ پولیس چوکی کو بم سے اڑانے کے واقعے کی ذمہ داری قبول کرلی۔ انہوں نے کہا کہ جب تک صوبائی حکومت ان کے ساتھ کیےگئےمعاہدے پر مکمل عملدرآمد نہیں کرتی طالبان امن کے قیام کی ضمانت نہیں دے سکتے۔

ان کے بقول معاہدے کے مطابق حکومت علاقے میں شرعی نظام نافذ کرے اور سوات سے سکیورٹی فورسز کو نکال دے۔ یاد رہے صوبہ سرحد کے وزیر اعلیٰ امیرحیدر خان ہوتی نے جمعہ کو کہا تھا کہ حکومت سوات میں طالبان سے کیے گئے معاہدے کی اب بھی پابند ہے۔

پولیس گاڑی پر فائرنگ، تین ہلاک
سنیچر کی شام ایک الگ واقعے میں پولیس کی گاڑی پر ہونے والی نامعلوم افراد کی فائرنگ سے تین اہلکار ہلاک ہوگئے۔ مقامی حکام نے ان ہلاکتوں کی تصدیق کردی ہے۔ فائرنگ کا یہ واقعہ مینگ بولی میں پیش آیا۔