حسن مجتٰبی بی بی سی اردو ڈاٹ کام، نیویارک

	’عافیہ صدیقی لاغر اور پریشان حال نظر آ رہی تھیں‘

یہ بات نیویارک میں عافیہ صدیقی کی وکیل الزبتھ فنک نے مقامی میڈیا کو بتائی ہے۔ الزبتھ فنک نے بتایا ہے کہ سنیچر کی صبح وہ نیویارک کے بروکلین ڈیٹنشن سنٹر میں قید ڈاکٹر عافیہ سے نیویارک میں پاکستانی نائب قونصل جنرل ثاقب رؤف اور واشنگٹن سے آنے والے ایک پاکستانی سفارتکار کی ملاقات کے دوران موجود تھیں۔

اطلاعات کے مطابق ، عافیہ صدیقی لاغر اور پریشان حال نظر آ رہی تھیں۔ اس موقع پر پاکستانی سفارتی نمائندوں نے جیل انتظامیہ اور امریکی حکام سے کہا کہ اس بات کو یقینی بنایا جائے کہ ڈاکٹر عافیہ صدیقی کو امریکی آئین و قوانین کے مطابق سہولیات مہیا کی جاتی ہیں۔

بعد میں مقامی میڈیا نے نیویارک میں پاکستانی قونصل خانے کے ذرا‏ئع سے بتایا ہے کہ پاکستانی حکومت نے امریکی حکام سے کہا ہے وہ نیویارک اور واشنگٹن میں موجود سفاتکاروں کے ذریعے اس بات کو یقینی بنائيں گے کہ دوران مقدمہ ڈاکٹر عافیہ صدیقی کے ساتھ ان کے کیس میں انصاف کے تمام تقاضے پورے کیے جاتے ہیں۔

ایک رپورٹ کے مطابق، ڈاکٹر عافیہ صدیقی کی وکیل الزبتھ فنک نے جیل انتظامیہ سے کہا کہ ڈاکٹر عافیہ کے مذہبی عقائد اور عبادات کے احترام کو بھی ملحوظ خاطر رکھا جائے۔

ڈاکٹر عافیہ کی وکیل کے مطابق، ڈاکٹر عافیہ نے پاکستانی سفارتکاروں سے اپنی گرفتاری سے قبل یا بعد کے حالات پر بات نہیں کی کیونکہ امریکی قوانین کے مطابق، ان کی طرف سے کی گئی کوئی بھی بات ان کے خلاف کسی بھی عدالت یا کورٹ آف لاء میں پیش کی جا سکتی ہے۔

یاد رہے کہ ڈاکٹر عافیہ کے مقدمے میں پاکستانی حکومت دلچسپی لے رہی ہے اور ایک رپورٹ کے مطابق، پاکستانی وزارت خارجہ نے امریکہ میں اپنے سفارتخانے کو ڈاکٹر عافیہ کے کیس کو مانٹیر کرنے کی بھی ہدایات دی ہوئی ہیں۔