آصف فاروقی بی بی سی اردو ڈاٹ کام، اسلام آباد

	انسانی حقوق کی ایک تنظیم کا الزام ہے کہ ڈاکٹر عافیہ بگرام ائر بیس میں قید ہیں۔

لیکن عدالت نے جوہری سائنسدان ڈاکٹر عبدالقدیر خان کو عدالتی حکم کے باوجود رشتہ داروں اور دوستوں سے ملاقات کے لئے سہولیات فراہم نہ کرنے پر سیکرٹری داخلہ سمیت دیگر سرکاری افسران کے خلاف توہین عدالت کی کارروائی کی درخواست مسترد کر دی۔

یہ دونوں درخواستیں بیرسٹراقبال جعفری نے دائر کی تھیں۔

ڈاکٹر عافیہ کے معاملے میں بیرسٹر جعفری نے سیکرٹری داخلہ کمال شاہ کے توسط سے پاکستان کے انٹیلی جنس اداروں کو اور امریکی سفارتخانے کے قانونی مشیر کے ذریعے امریکی انٹیلیجنس اداروں کو فریق بنایا ہے۔

درخواست میں انسانی حقوق کی تنظیم ایشیئن ہیومن رائٹس کونسل کی ایک رپورٹ کا حوالہ دیا گیا ہے جس کے مطابق ڈاکٹر عافیہ کو پاکستانی اور امریکی انٹیلی جنس ایجنسیوں نے گرفتار کرنے کا اعتراف کیا تھا لیکن بعد میں اس سے لا تعلقی ظاہر کر دی گئی تھی۔

ڈاکٹر عافیہ اپنے تین نو عمر بچوں کے ہمراہ کراچی سے پانچ برس قبل لاپتہ ہو گئیں تھیں۔ ان پر القاعدہ کی مدد کرنے کا الزام ہے اور پوچھ گچھ کے لیے وہ امریکی تفتیشی ایجنسی ایف بی آیی کو مطلوب ہیں۔

	بگرام میں امریکہ کا فوجی ٹھکانہ

انسانی حقوق کی ایشیائی تنظیم نے خیال ظاہر کیا ہے کہ ڈاکٹر عافیہ کو افغانستان میں بگرام کے مقام پر قائم امریکی جیل میں قید رکھا گیا ہے جہاں وہ قیدی نمبر 650 کے نام سے مشہور ہیں۔

اس درخواست پر سماعت بدھ کے روز متوقع ہے۔

بیرسٹر جعفری نے ڈاکٹر قدیر خان کے کیس میں اپنی درخواست میں کہا تھا کہ مذکورہ افسران ڈاکٹر قدیر کی اپنے دوستوں اور رشتہ داروں سے ملاقات میں اکیس جولائی کے عدالتی حکم کے تحت سہولیات فراہم کرنے میں پس و پیش سے کام لے رہے ہیں۔

عدالت نے اپنے مختصر فیصلے میں کہا کہ پٹیشنر افتخار حسین کا اس مقدمے سے کوئی تعلق نہیں ہے اور وہ اس مقدمے کے بارے میں کسی اعتراض کے مجاز نہیں ہیں۔ عدالت نے کہا کہ درخواست میں صدر مملکت کو بھی فریق بنانے کی درخواست کی گئی ہے جبکہ آئین کی دفعہ 246 کے تحت ایسا ممکن نہیں ہے۔