آصف فاروقی بی بی سی اردو ڈاٹ کام، اسلام آباد

	انسانی حقوق کی ایک تنظیم کا الزام ہے کہ ڈاکٹر عافیہ بگرام ائر بیس میں قید ہیں۔

بدھ کے روز وزارت کے سیکرٹری سید کمال شاہ کو بھیجےگئے ایک نوٹس میں چیف جسٹس سردار محمد اسلم پر مشتمل عدالت نے ان سے کہا کہ ہے کہ وہ بیرسٹر اقبال جعفری کی جانب سے لگائے گئے الزامات کا جواب دیں جن میں کہا گیا ہے کہ ڈاکٹر عافیہ صدیقی پاکستانی اور امریکی خفیہ اداروں کی تحویل میں ہیں۔

عدالت نے بیرسٹر اقبال جعفری کی جانب سے دائر کی گئی درخواست پر ابتدائی سماعت کے بعد عدالت کی کارروائی نو ستمبر تک ملتوی کر دی اور اس دوران سیکرٹری داخلہ سے کہا گیا ہے وہ پٹیشنٹر کی جانب سے اٹھائے گئے نکات کے جواب دو ستمبر تک عدالت میں جمع کروائیں۔

ڈاکٹر عافیہ صدیقی کو حبس بے جا میں رکھنے کی درخواست میں بیرسٹر اقبال جعفری نے سیکرٹری داخلہ کمال شاہ کے توسط سے پاکستان کے انٹیلی جنس اداروں کو امریکی سفارتخانے کے قانونی مشیر کے ذریعے امریکی انٹیلیجنس اداروں کو فریق بنایا ہے۔

درخواست میں ایشین ہیومن رائٹس کونسل کی ایک رپورٹ کا حوالہ دیا گیا ہے جس کے مطابق ڈاکٹر عافیہ کو پاکستانی اور امریکی انٹیلیجنس ایجنسیوں نے گرفتار کرنے کا اعتراف کیا تھا لیکن بعد میں اس سے لا تعلقی ظاہر کر دی گئی تھی۔

ڈاکٹر عافیہ اپنے تین نو عمر بچوں کے ہمراہ کراچی سے پانچ برس قبل لاپتہ ہو گئیں تھیں۔ ان پر القاعدہ کی مدد کرنے کا الزام ہے۔ انسانی حقوق کی ایشیائی تنظیم نے خیال ظاہر کیا ہے کہ ڈاکٹر عافیہ کو افغانستان میں بگرام کے مقام پر قائم امریکی جیل میں قید رکھا گیا ہے جہاں 650 نمبر کے نام سے مشہور اس قیدی کے ساتھ مبینہ طور پر غیر انسانی سلوک روا رکھا جا رہا ہے۔