عبدالحئی کاکڑ بی بی سی اردو ڈاٹ کام، پشاور

	تین دنوں میں ایک اندازے کے مطابق67 لوگ ہلاک ہو چکے ہیں

سوات میں کشیدگی، تصاویر

پاکستانی فوج کے ترجمان میجر جنرل اطہر عباس نے بی بی سی سے بات چیت کرتے ہوئے دعویٰ کیا کہ بدھ اور جمعرات کی درمیانی شب کو طالبان اورسکیورٹی فورسز کے درمیان ہونے والی جھڑپ میں بیس مزید طالبان کو ہلاک کیا گیا ہے۔

ان کے دعوی کے مطابق بدھ کی صبح سے شروع ہونے والی جھڑپوں میں اب تک پینتالیس کے قریب طالبان عسکریت پسندوں کو ہلاک کیا گیا ہے۔ مقامی حکام کے مطابق تازہ ہلاکتیں بدھ اور جمعرات کی درمیانی شب کوتحصیل مٹہ کے باما خیلہ کے علاقے میں ہوئی ہیں۔

’دشمن ملکوں کی لڑائی‘  گزشتہ شب کی شدید فائرنگ کے نتیجے میں پندرہ مکانوں کو نقصان پہنچا ہے۔فریقین نے ایک دوسرے پر اتنی شدید فائرنگ کی جیسے دو دشمن ممالک کے درمیان لڑائی ہورہی ہو شہری ابراہیم

بدھ اور جمعرات کی شب کو تحصیل کبل کے علاقے دیولئی میں طالبان اور سکیورٹی فورسز کے درمیان ہونے والی دو طرفہ فائرنگ کے نتیجے میں ایک اہلکار اور نو عام شہریوں سمیت دس افراد ہلاک ہوگئے تھے۔ ہلاک ہونے والوں میں ایک ہی خاندان کے سات افراد بھی شامل ہیں۔

تیس ہزار نفوس پر مشتمل دیولئی کے ایک رہائشی ابراہیم نے بی بی سی کو بتایا کہ گزشتہ شب کی شدید فائرنگ کے نتیجے میں پندرہ مکانوں کو نقصان پہنچا ہے۔ان کے مطابق’ فریقین نے ایک دوسرے پر اتنی شدید فائرنگ کی جیسے دو دشمن ممالک کے درمیان لڑائی ہورہی ہو۔‘

انہوں نے مزید کہا کہ علاقے سے تقریباً چالیس خاندانوں نے محفوظ مقامات کی طرف نقل مکانی کی ہے۔

دوسری طرف سوات میں بدھ کو نافذ ہونے والے کرفیو میں جمعرات کے روز دس سے بارہ بجے تک نرمی کی گئی۔ اس دوران گھروں میں محصور لوگوں نے باہر نکل کرضروری اشیاء کی خریداری کی۔

مقامی لوگوں کا کہنا ہے کہ علاقےمیں کشیدہ صورتحال کی وجہ سے تعلیمی ادارے اور سرکاری دفاتر بند پڑے ہیں۔ طالبان اور سکیورٹی فورسز کے درمیان گزشتہ تین دنوں سے وقفے وقفے سے جاری جھڑپوں میں اب تک سکیورٹی فورسز کے گیارہ اہلکاروں، پینتالیس طالبان اور گیارہ شہریوں سمیت مجموعی طور پر 67 افراد ہلاک ہوچکے ہیں۔ طالبان اپنے پانچ ساتھیوں کی ہلاکت کی تصدیق کررہے ہیں۔