بیورو رپورٹ بی بی سی اردو ڈاٹ کام، اسلام آباد

	حکومت اب تک ڈیزل اور مٹی کے تیل پر دو سو ارب روپے سے زائد کی سبسڈی دے چکی ہے

پیٹرول کی قیمت میں بھاری اضافہ

پٹرولیم اور قدرتی وسائل کے وفاقی سیکرٹری جی ای صابری نے منگل کے روز اسلام آباد میں پریس کانفرنس میں بتایا کہ موجودہ حکومت اب تک ڈیزل اور مٹی کے تیل پر دو سو ارب روپے سے زائد کی سبسڈی دے چکی ہے۔

جی اے صابری نے کہا کہ پٹرولیم مصنوعات کی قیمتوں کے تعین کے لیے حکومت نئے فارمولے کی تیاری پر غور کر رہی ہے اور اس مقصد کے لیے قومی تعمیر نو بیورو کے سربراہ ڈاکٹر عاصم کی سربراہی میں ایک خصوصی کمیٹی بھی تشکیل دی جاچکی ہے۔ انہوں نے امید ظاہر کی کہ نئے فارمولے پر عمل کرنے سے تیل کی قیمتوں میں دباؤ کو کم کرنے میں مدد ملے گی۔

انہوں نے کہا ڈیزل کی قیمت کو کم رکھنے کے لیے جو سبسڈی دی جا رہی ہے اسے زیادہ مدت تک جاری رکھنا ممکن نہیں ہوگا کیونکہ عالمی مالیاتی اداروں سے کیے جانے والے معاہدوں کے تحت حکومت تمام سبسڈیز ختم کرنے کی پابند ہے۔

انہوں نے بتایا کہ یہ سبسڈی ایک ارب روپے روزانہ ہے لیکن اگر اس میں سے ان مصنوعات پر عائد جنرل سیلز ٹیکس کی شرح کو منہا کر لیا جائے تو بھی ہر ماہ حکومت سترہ ارب روپے کی نیٹ سبسڈی ڈیزل اور مٹی کے تیل کے لیے ہر ماہ ادا کرتی ہے۔

انہوں نے بتایا کہ پاکستان میں تیل کی مصنوعات کی قیمتیں بین الاقوامی مارکیٹ سے لازمی طور پر متاثر ہوں گی کیونکہ پاکستان میں استعمال ہونے والی ان مصنوعات کا پچاسی فیصد درآمد کیا جاتا ہے۔

تاہم ان بڑھتی قیمتوں کو کسی حد تک ریگلولیٹ کرنے کے لیے حکومت ان کی قیمت کا تعین کرنے کے لیے نئےفارمولے پر عمل کرے گی۔

جی اے صابری نے کہا کہ پٹرولیم مصنوعات کی قیمتوں کے تعین کے لیے حکومت نئے فارمولے کی تیاری پر غور کر رہی ہے اور اس مقصد کے لیے قومی تعمیر نو بیورو کے سربراہ ڈاکٹر عاصم کی زیرسربراہی ایک خصوصی کمیٹی بھی تشکیل دی جا چکی ہے۔ انہوں نے امید ظاہر کی کہ نئے فارمولے پر عمل کرنے سے تیل کی قیمتوں میں دباٰؤ کو کم کرنے میں مدد ملے گی۔