آصف فاروقی بی بی سی اردو ڈاٹ کام، اسلام آباد

	عام صارف پٹرولیم مصنوعات پر فی لیٹر پانچ سے تیرہ روپے اضافی ادا کرنے پر مجبور ہے

سرکاری اعداد و شمار کے مطابق عالمی مارکیٹ میں تیل کی بڑھتی قیمتوں کے ساتھ ساتھ پاکستان میں تیل کی درآمد، اس کی صفائی اور ترسیل کے نام پر کمائے جانے والے نفع میں بھی حکومتی دعوؤں کے برعکس مسلسل اضافے کا عمل جاری ہے۔

ڈیزل پر سبسڈی دینا مشکل ہے: حکومت

تیل اور گیس کے ریگولیٹری ادارے اوگرا سے حاصل کردہ سرکاری اعداد و شمار کے مطابق ان پانچ ماہ کے دوران تیل بیچنے والی غیر ملکی کمپنیوں اور ان کے مقامی ڈیلروں کے منافع میں پچاس فیصد سے زائد اضافہ کیا گیا ہے جبکہ پٹرولیم مصنوعات کی قیمتیں ملک کے طول و عرض میں ایک ہی سطح پر رکھنے کے لیے ٹرانسپورٹرز کو دئیے جانے والے نفع میں کیا گیا اضافہ قریباً سو فیصد ہے۔

تاہم حکومت نے پٹرولیم ڈیویلپمنٹ چارجز کا خاتمہ کیا ہے جو فی لیٹر پچاس پیسے ہوا کرتا تھا۔ یہاں یہ امر قابل ذکر ہے کہ نگران حکومت نے پٹرولیم ڈیویلپمنٹ لیوی کے نام پر خالص سرکاری نفعے کو ساڑھے سات روپے سے کم کر کے پچاس پیسے کیا تھا۔

پٹرول کی قیمت میں ریفایئنری سے لیکر صارف تک پہنچنے کے اخراجات کو تقریباً دوگنا کر دیا گیا ہے۔ اٹھارہ فروری کو ریفائنری سے حاصل ہونے والے قابل استعمال پٹرول کی قیمت چوالیس روپے تھی جبکہ تمام منافعوں، اخراجات اور ٹیکسز کے بعد صارف کے لیے یہ پٹرول تریپن روپے میں دستیاب تھا یعنی ریفائنری سے صارف تک پہنچنے کے دوران پٹرول کی قیمت میں نو روپے کا اضافہ ہوا کرتا تھا۔ آج تیل ریفائنری سے یہ پٹرول انہتر روپے میں حاصل کیا جاتا ہے جبکہ پٹرول پمپ پر یہ چھیاسی روپے میں دستیاب ہے۔ ریفائنری اور پمپ کی قیمت میں یہ فرق اب سترہ روپے تک پہنچ گیا ہے۔

کسانوں کے ٹیوب ویلز میں استعمال ہونے والے لائیٹ ڈیزل آئیل کو پر عائد سیلز ٹیکس میں اسی فیصد اور اسے فروخت کرنے والی مارکیٹنگ کمپنیوں کے نفع میں ڈیڑھ سو فیصد اضافہ کر کے اس پر عائد مجموعی اخراجات میں اسی فیصد اضافہ کر دیا گیا ہے۔

گاڑیوں میں بطور ایندھن استعمال ہونے والے ڈیزل کا معاملہ ذرا مختلف ہے۔ شوکت عزیز کی حکومت نےڈی ریگولیش اور فری مارکیٹ اکانومی کی پالیسی کے تحت پٹرولیم مصنوعات کی درآمد، قیمتوں کے تعین اور ترسیل کے معاملات سے حکومت کو الگ کرنے کا سلسلہ شروع کیا تھا اور ڈیزل کو اس فہرست میں پہلے نمبر پر رکھا گیا تھا۔

لہٰذا ڈیزل کی قیمت کا تعین اب خالصتاً مارکیٹ کے اتار چڑھاؤ کے مرہون منت ہے۔ اسی وجہ سے اس کے نرخ میں اتنا زیادہ تغیر پایا جاتا ہے کہ حکومت کو اسے صارفین کی پہنچ میں رکھنے کے لیے تیس روپے فی لیٹر تک سبسڈی دینی پڑ رہی ہے۔

ماہرین کہتے ہیں کہ ریفائنری سے حاصل ہونے والے ڈیزل اور تیل کی قیمت کو بھی کم کیا جانا چاہئے۔ طویل عرصے تک پٹرولیم صنعت میں اعلٰی عہدوں پر کام کرنے والے سینیٹر دلاور عباس کا کہنا ہے پٹرول اور ڈیزل کی صفائی پر اٹھنے والے اخراجات اتنے نہیں جتنا کہ آئل ریفائنریز ظاہر کرتی ہیں۔

اسی طرح ڈیزل کی صفائی کا معیار بھی اس کے اخراجات کے مطابق نہیں ہے لہٰذا حکومت آئیل ریفائنری کے نفع کو کافی حد تک کم کرسکتی ہے۔

نا اہلی  ’مارکیٹنگ کمپنیز کو یہ اضافی نفع چار سال قبل دینا شروع کیا گیا تھا اور ان سے کہا گیا تھا کہ وہ ملک کے لیے تیل کے اضافی ذخائر بنائیں۔ یہ پروجیکٹ اب مکمل ہو گیا ہے اور اس نفع پر نظر ثانی کی ضرورت ہے لیکن حکومت صرف اپنی کاہلی اور نا اہلی کی وجہ سے اس بارے میں کوئی پالیسی نہیں بنا پا رہی۔ دلاور عباس

’ہم نے حکومت سے یہ بھی کہا تھا کہ مارکیٹنگ کمپنیوں اور ڈیلرز کے نفع میں بھی کمی ممکن ہے لیکن حکومت نے اس میں کمی کے بجائے ان غیر ملکی کمپنیوں کے نفع میں اضافہ کر دیا ہے۔‘

انہوں نے کہا ’مارکیٹنگ کمپنیز کو یہ اضافی نفع چار سال قبل دینا شروع کیا گیا تھا اور ان سے کہا گیا تھا کہ وہ ملک کے لیے تیل کے اضافی ذخائر بنائیں۔ یہ پروجیکٹ اب مکمل ہو گیا ہے اور اس نفع پر نظر ثانی کی ضرورت ہے لیکن حکومت صرف اپنی کاہلی اور نا اہلی کی وجہ سے اس بارے میں کوئی پالیسی نہیں بنا پا رہی۔‘