نثار کھوکھر بی بی سی اردو ڈاٹ کام سکھر

	سماجی تحفظ کے ادارے نہ ہونے کی وجہ سے مسائل میں اضافہ

ایدھی سنٹر حیدرآباد کے ترجمان معراج احمد نے بی بی سی کو بتایا ہے کہ سنیچر کو ایک پردہ پوش خاتون نے اپنا بچہ ان کے حوالے کرتے ہوئے کہا کہ وہ غربت کی وجہ سے بچے کی کفالت نہیں کرپارہی ہیں اور انہیں امید ہے کہ ایدھی والے اچھے طریقے سے بچے کی پرورش کر پائیں گے۔

ایدھی سنٹر نے اپنے اصول کے تحت بچے کی ماں سے نام اور جائز ناجائز جیسے سوالات کرنے سے گریز کیا۔ایدھی سنٹر کے ترجمان کےمطابق حیدرآباد میں یہ پہلا موقع ہے کہ کسی خاتون نے غربت کی وجہ سے اپنا بچہ ان کے حوالے کردیا ہے۔اس سے قبل غیر شادی شدہ جوڑوں سے پیدا ہونے والے بچے ایدھی سنٹر میں چھوڑے جاتے رہے ہیں۔

سندھ میں غربت اور بیروزگاری سے تنگ آ کر سنیچر کے روز مختلف علاقوں میں کم از کم دو افراد نے خودکشی کی ہے

سندھ میں غربت اور بیروزگاری سے تنگ آ کر سنیچر کے روز مختلف علاقوں میں کم از کم دو افراد نے خودکشی کی ہے۔

سانگھڑ ضلع کے شہر جہول میں ایک تیس سالہ بیمار نوجوان الہڈتا ماچھی نے علاج کی رقم نہ ہونے کی وجہ سے خودسوزی کر دی ہے۔ان کے ورثاء کے مطابق وہ گزشتہ پانچ برسوں سے دمے اور جوڑوں کی بیماری میں مبتلا تھے۔اپنے والدین کے اکلوتے بیٹے الہڈتا نے اپنےکمرے کا دروازہ بند کیا اور مٹی کا تیل جسم پر چھڑک کر خو کو آگ لگادی۔انہیں سانگھڑ اور حیدرآباد کی ہسپتالوں میں علاج کے لایا گیا مگر وہ بچ نہ سکے۔

کم آمدنی والے افراد میں بڑھتی ہوئی مہنگائی کے بعد خودکشیوں کی تعداد میں اضافہ دیکھنے میں آیا ہے غربت نے انہیں خودکشی کے اور قریب کردیا ہے پروفیسر ڈاکٹر رفیق احمد چانڈیو

یونیورسٹی آف سندھ جامشورو کے شعبے اقتصادیات کے اسسٹنٹ پروفیسر ڈاکٹر رفیق احمد چانڈیو نے بی بی سی کو بتایا ہے کہ کم آمدنی والے افراد میں بڑھتی ہوئی مہنگائی کے بعد خودکشیوں کی تعداد میں اضافہ دیکھنے میں آیا ہے۔ان کی بنیادی وجہ نفسیات ہے مگر غربت نے انہیں خودکشی کے اور قریب کردیا ہے۔

ان کا کہنا تھا کہ معاشرے میں ایسے بہت سے غریب لوگ موجود ہیں جو خودکشیاں نہیں کرتے مگر سماجی تحفظ کے ادارے نہ ہونے کی وجہ سے کم آمدنی والے افراد خودکشی کے زیادہ قریب آگئے ہیں۔

سندھ میں بھوک ،غربت اور خودکشیوں کی خبریں ایسے وقت میں آرہی ہیں جب پیپلزپارٹی کی حکومت غربت اور بیروزگاری کے خاتمے کے لیے روزانہ اخبارات میں بھاری رقم سے اشتہاری مہم کو آگے بڑھانے میں مصروف ہے۔