مہمند ایجنسی میں پیش آنے والے واقعے میں گیارہ پاکستانی فوجی ہلاک ہوئے تھے

واشنگٹن میں بی بی سی کے نامہ نگار براجیش اوپادھیائے نے بتایا ہے کہ گزشتہ روز امریکہ میں پاکستان کے سفیر حسین حقانی نے امریکی وزیرِ دفاع رابرٹ گیٹس سے ملاقات کی تھی۔ اس ملاقات میں امریکی انتظامیہ کے کچھ اعلیٰ اہلکار بھی شریک تھے۔

ہمارے نامہ نگار کے مطابق واشنگٹن میں پاکستانی سفارت خانے کے ایک ترجمان نے اس ملاقات پر تبصرہ کرتے ہوئے کہا کہ رابرٹ گیٹس سے ملاقات کے دوران سفیرِ پاکستان نے اس معاملے پر بھی گفتگو کی اور رابرٹ گیٹس نے اس پر افسوس کا اظہار کیا۔

گیارہ جون کو قبائلی علاقے مہمند ایجنسی میں افغان سرحد کے قریب امریکی فوج کے راکٹ حملے میں گیارہ پاکستانی فوجیوں سمیت بیس افراد ہلاک ہو گئے تھے۔ ہلاک ہونے والوں میں پاکستانی فوج کا ایک افسر بھی شامل ہے۔

پاکستان فوج کے ترجمان نے افغانستان میں موجود کثیر الاقومی فوج کی طرف سے اس حملے کی شدت ترین الفاظ میں مذمت کی تھی اور کہا تھا کہ اس سے دہشت گردی کے خلاف جنگ میں جاری تعاون کو شدید دھچکا پہنچا ہے۔

ابتدا میں افغانستان میں امریکی فوج کے ترجمان نے پاکستان کے قبائلی علاقے میں حملے کی تصدیق کی تھی لیکن امریکی فوجی ترجمان نے مزید کچھ بتانے سے گریز کیا تھا۔

تاہم بعد میں امریکہ کی وزارتِ دفاع نے پاکستان کے قبائلی علاقے میں حملے کو جائز قرار دیا تھا۔امریکی وزارتِ دفاع پینٹاگون سے جاری ہونے والے ایک بیان میں کہا گیا تھا کہ امریکی فوجیوں نے اپنے دفاع میں یہ کارروائی کی تھی۔