ذوالفقار علی بی بی سی اردو ڈاٹ کام، اسلام آباد

	عالمی بازار میں تیل کی قمیتوں میں اضافے کے سبب دنیا بھر میں تیل کی قمیتیں متاثر ہوئی ہیں۔

حکومت پاکستان کی طرف سے پیٹرول کی فی لیٹر قیمت میں چھ روپے اٹھاسی پیسے، ڈیزل کی قیمت میں پانچ روپے ایک پیسے کا اضافہ کیا گیا ہے جبکہ مٹی کے تیل کی قیمت میں آٹھ روپے انتیس پیسے فی لیٹر بڑھا دی گئی ہے۔

نئی قیمتوں کے نفاذ کے بعد فی لیٹر پیڑول کی قیمت پچہتر روپے انہتر پیسے، ڈیزل کی قیمت پچپن روپے پندرہ پیسے جبکی مٹی کا تیل انچاس روپے تہتر پیسے ہوگئی ہے۔

اس برس مارچ کے آخر میں پیپلز پارٹی کی قیادت میں بننے والی مخلوط حکومت کی قیام کے بعد تین ماہ میں یہ پیڑولیم مصنوعات میں کیا جانے والا تیسرا اضافہ ہے جبکہ نگراں حکومت کے دور میں بھی پیڑولیم کی مصنوعات میں دو مرتبہ اضافہ کیا گیا تھا۔

حکومت کا کہنا ہے کہ عالمی بازار میں تیل کی قیمتوں میں اضافے کے پیش نظر قیمتیں بڑھانا ناگزير تھا۔ عالمی منڈی میں خام تیل کی قیمیت تقریباً ایک سو بیالیس ڈالر فی بیرل تک پہنچ گئی ہے۔

مبصرین کا کہنا ہے کہ پاکستان میں پڑولیم مصنوعات میں اضافے کے باعث منہگائی میں اضافہ ہوگا اور لوگوں کی مشکلات بڑھیں گی۔