عزیزاللہ خان بی بی سی اردو ڈاٹ کام کوئٹہ

	بلوچستان میں ریل کی پٹڑیوں، بجلی کے کھمبوں اور پائپ لائنوں کا نشانہ بنایا جاتا رہا ہے۔

یہ دھماکے صبح سویرے کوئٹہ سے کوئی بیس کلومیٹر دور سپیزنڈ کے مقام پر ہوا ہے جس سے ریل کی پٹڑی کا دو فٹ ٹکڑا اُڑ گیا ہے۔

ریلوے حکام نے بتایا ہے کہ اس دھماکے کے بعد کوئٹہ سے ملک کے دیگر علاقوں کو جانے والی ریل گاڑیاں چلتن ایکسپریس اور کوئٹہ ایکسپریس کو روک دیا گیا ہے جبکہ آنے والی دو ریل گاڑیاں جعفر اور بولان ایکسپریس ابھی راستے میں ہیں۔ پٹڑی کی مرمت کا کام تاحال شروع نہیں کیا جا سکا۔

ریلوے حکام نے بتایا ہے کہ پہلے بم ڈسپوزل سکواڈ کی جانب سے موقع کی جانچ پڑتال کی جائے گی اور پھر مرمت کا کام شروع کیا جائےگا۔ ماضی میں اس طرح کے واقعات پیش آچکے ہیں جب ریل کی پٹڑی یا بجلی کے کھمبوں کی مرمت کے لیے اہلکار پہنچے ہیں تو اس وقت اور دھماکے ہوے ہیں جس سے جانی نقصان ہو چکے ہیں۔

بلوچستان میں قانون نافذ کرنے والے اہلکاروں کے علاوہ ’ٹارگٹ کلنگ‘ کے واقعات میں اضافہ ہوا ہے۔

دو روز قبل نصیر آباد میں نامعلوم افراد کی فائرنگ سے فرنٹییر کور یعنی نیم فوجی دستے کے دو اہلکار ہلاک اور ایک زخمی ہوگیا تھا جبکہ اس سے ایک روز پہلے کوئٹہ میں ایک اے ایس آئی اور حب میں دو پولیس اہلکاروں کو ہلاک اور دو کو زخمی کر دیاگیا تھا۔ قلات میں ملتان سے تعلق رکھنے والے مزدوروں کے گھر پر دستی بم پھینک دیا گیا تھا جس سے ایک خاتون ہلاک اور چھ افراد زخمی ہوگئے تھے۔

اگرچہ یہ واقعات کافی عرصہ سے پیش آرہے ہیں لیکن پولیس تاحال اصل ملزمان گرفتار کرنے میں ناکام رہی ہے۔ صوبائی حکومت نے آج اخبارات میں اشہارات کے ذریعے ملزمان کی گرفتاری میں مدد دینے والے افراد کے لیے انعامات کا اعلان کیا ہے۔