عبدالحئی کاکڑ بی بی سی اردوڈاٹ کام، پشاور

	مسلح شدت پسندوں کے درمیان تصادم میں متعدد بچے اور خواتین بھی ہلاک ہوچکی ہیں

حکام کا کہنا ہے کہ خیبر ایجنسی کے علاقے تیراہ کے شلوبر، زخہ خیل، سنڈھ پاک، درپیر اور آس پاس کے گاؤں میں مقامی شدت پسند تنظیموں لشکر اسلام اور انصارالاسلام کے مسلح حامیوں کے درمیان لڑائی پیر کے روز بھی جاری رہی جس میں مزید پانچ افراد ہلاک ہوگئے ہیں۔

تحصیل باڑہ کے اسسٹنٹ پولٹیکل ایجنٹ خالد کُنڈی نے بی بی سی کو بتایا کہ تیراہ میں شدت پسند تنطیموں کے درمیان تیسرے روز بھی جھڑپیں جاری ہیں اور سنیچر اور اتوار کوہونے والی جھڑپوں میں دونوں طرف سے پندرہ افراد ہلاک ہوگئے ہیں۔

تاہم ایک اور حکومتی اہلکار نے بتایا کہ پیر کے روز ہونے والی جھڑپوں میں آخری اطلاعات ملنے تک پانچ افراد ہلاک ہوگئے، جس سے تین روز سے جاری لڑائی میں مرنے والوں کی تعداد بیس تک پہنچ گئی ہے۔

حکام کے مطابق فریقین ایک دورسرے کے خلاف، مارٹر گولے، راکٹ اور میزائل کے علاوہ ہلکے ہتھیاروں کا بھی آزادانہ استعمال کررہے ہیں۔

تین روز گزرنے کے باوجود بھی مقامی انتظامیہ لڑائی روکنے میں کامیاب نہیں ہوسکی ہے۔ایک اہلکار کے بقول حکومت نے ابھی تک اس سلسلے میں کسی قسم کی کوئی حکمت عملی واضح نہیں کی ہے۔

جس علاقے میں شدت پسند تنظیموں کے مسلح حامیوں کے درمیان لڑائی جاری ہے اُسے انصار السلام کا گڑھ سمجھا جاتا ہے۔ جبکہ لشکر اسلام کی کوشش ہے کہ تحصیل باڑہ کے بعد ان علاقوں کو بھی اپنے قبضے میں لے لیں۔

خیبر ایجنسی میں مبینہ طور پر سرگرم کئی مقامی شدت پسند تنظیموں کے درمیان گزشتہ تین سالوں سے لڑائیاں جاری ہیں، جس میں اب تک سینکڑوں افراد مارے جاچکےہیں۔ مرنے والوں میں بچوں اور خواتین کی بھی کافی تعداد شامل ہے۔

علاقےمیں عام تاثر ہے کہ صوبائی دارالحکومت پشاور کے سنگم پر واقع اس قبائلی ایجنسی میں حکومتی عملداری تقریباً ختم ہوچکی ہے۔