اعجاز مہر بی بی سی اردو ڈاٹ کام، اسلام آباد

	نواز شریف کا بیان کا بیان تبصرے کے لائق ہی نہیں: راشد قریشی

سرکاری ٹیلیویژن پی ٹی وی کے مطابق صدرم مشرف نے سابق گورنر پنجاب خالد مقبول کے اعزاز میں دیے گئے الوداعی عشائیے میں کہا کہ یہ(ان کے استعفے) کی افواہیں ایک مہم کا حصہ ہیں اور ان کا مقصد ملک کو نقصان پہنچانا ہے۔ انہوں نے مزید کہا کہ ان افواہوں کی مہم سے یہ غلط تاثر پیدا کیا جا رہا ہے کہ ان میں اور فوج کے درمیان اختلافات ہیں۔

اس سے قبل جمعرات کو ہی بی بی سی سے بات کرتے ہوئے صدر کے ترجمان نے کہا کہ صدر کے حکومتِ پاکستان سے اچھے تعلقات ہیں اور وہ قائم رہیں گے۔انہوں نے بعض اخبارات میں شائع ہونے والی ان خبروں کو من گھڑت اور بے بنیاد قرار دیا جن میں کہا گیا ہے گزشتہ شب آرمی چیف سے ملاقات کے بعد صدر نے مستعفی ہونےکا فیصلہ کیا ہے اور کسی بھی وقت اس کا اعلان متوقع ہے۔

سابق وزیراعظم میاں نواز شریف کی جانب سے صدر پرویز مشرف کو ہٹانے اور ان پر غداری کا مقدمہ چلانے کے بیان پر راشد قریشی نے کہا کہ ان کا بیان تبصرے کے لائق ہی نہیں ہے۔

جب انہیں یاد دلایا گیا کہ پیپلز پارٹی کے شریک چیئرمین آصف علی زرداری نے بھی کہا ہے کہ صدر کو ہٹانے کے لیے عوام کا ان پر دباؤ ہے اور پیپلز پارٹی چاہتی ہے کہ صدر خود چلے جائیں بجائے اس کے ان کا احتساب ہو تو راشد قریشی نے کہا کہ وزیر اطلاعات شیری رحمٰن اور بعض دیگر حکومتی نمائندوں کے بیانات اس کے برعکس ہیں۔

گزشتہ شب آرمی چیف کی صدر سے ملاقات کی تصدیق کرتے ہوئے انہوں نے کہا یہ معمول کا حصہ ہے اور دونوں میں آئندہ بھی ملاقاتیں ہوتی رہیں گی۔ جب ان سے پوچھا گیا کہ صدر اور آرمی چیف کی ملاقات کے حوالے سے ایک انگریزی روزنامے نے اپنی خبر میں دعویٰ کیا ہے کہ آرمی چیف نے صدر سے کہا ہے کہ اگر انہوں نے اسمبلی توڑنے کا حکم جاری کیا تو فوج اس پر عمل نہیں کرے گی؟ تو اس کے جواب میں راشد قریشی نے کہا کہ یہ ملاقات کا موضوع تھا اور نہ اس پر کوئی بات ہوئی۔

اخبار کے مطابق بدھ کی رات آرمی چیف جنرل اشفاق پرویز کیانی نے صدر پرویز مشرف سے ساڑھے تین گھنٹے طویل ملاقات کی جس کے بعد صدر پرویز مشرف نے مستعفی ہونے کا فیصلہ کیا۔

ٹرپل ون بریگیڈ کمانڈر بریگیڈئر عاصم باجوہ کی تبدیلی معمول کا حصہ ہے۔ ان کی مدت پوری ہوگئی ہے اور وہ ایک کورس کے لیے امریکہ جا رہے ہیں میجر جنرل اطہر عباس

اخبار کے مطابق آرمی چیف نے صدر کو اسمبلی توڑنے کی صورت میں ان کے احکامات پر عمل نہ کرنے کے اپنے فیصلے سے آگاہ کیا۔ اخبار نے مزید لکھا ہے کہ آرمی چیف نے جہاں صدر پرویز مشرف کے محافظ دستے کو تبدیل کیا ہے وہاں سیاسی تبدیلیوں کی صورت میں فوری کارروائی کرنے والی راولپنڈی کور کی ٹرپل ون بریگیڈ کے کمانڈر جو کہ صدر پرویز مشرف کے انتہائی بااعتماد افسر ہیں انہیں بھی ہٹادیا ہے۔

تاہم جب پاکستان کے فوجی ترجمان میجر جنرل اطہر عباس سے اس بارے میں پوچھا گیا تو انہوں نے بی بی سی کو بتایا کہ صدر پرویز مشرف کی حفاظت پر مامور ایک کمانڈو کو بھی تبدیل نہیں کیا گیا تاہم ان کے بقول صدر کی حفاظت کی ذمہ دار آرمی یونٹ میں تبدیلی ہوئی ہے جو کہ معمول کی تبدیلی ہے۔

پاکستان میں فوجی بغاوتوں کےموقع پر اقتدار پر قبضہ کرنے والی راولپنڈی کور کی ٹرپل ون بریگیڈ کے کمانڈر کی تبدیلی کے بارے میں فوجی ترجمان نے بتایا کہ’بریگیڈ کمانڈر بریگیڈئر عاصم باجوہ کی تبدیلی معمول کا حصہ ہے۔ ان کی مدت پوری ہوگئی ہے اور وہ ایک کورس کے لیے امریکہ جا رہے ہیں‘۔

فوجی ترجمان کے مطابق بریگیڈئر باجوہ کا تبادلہ پونے پانچ سو افسران کے تبادلے کے اس حکم کا حصہ ہے جو ایک ماہ پہلے جاری ہوا تھا۔

ایک سوال کے جواب میں انہوں نے کہا کہ آرمی چیف کی صدر سے ملاقات اتنی طویل نہیں تھی جیسا کہ بعض اخبارات میں لکھا گیا ہے۔ جب ان سے پوچھا کہ یہ ملاقات کب اور کتنی دیر جاری رہی اور اس کے بارے میں پریس ریلیز کیوں جاری نہیں ہوئی تو فوجی ترجمان نے کہا کہ یہ ملاقات طویل دورانیے کی نہیں تھی اور اتنی غیر معمولی نوعیت کی بھی نہیں تھی کہ بیان جاری کیا جاتا۔

فوجی ترجمان نے کہا کہ بعض اخبارات معمول کے واقعات کو سنسنی خیز بنا کر پیش کرتے ہیں۔

صدر پرویز مشرف کے ہٹائے جانے کے بارے میں ایوان صدر اور فوجی ترجمانوں کا موقف اپنی جگہ لیکن اکثر تجزیہ کار اس بات پر متفق دکھائی دیتے ہیں کہ مسلم لیگ (ن) کے سربراہ میاں نواز شریف کے بعد آصف علی زرداری کی جانب سے صدر پرویز مشرف کو ہٹانے کے بیانات کے بعد بظاہر صدر پر دباؤ حد سے بڑھ گیا ہے اور وہ اضطرابی کیفیت میں مبتلا ہیں۔

ادھر پاکستان بھر میں آج صدر پرویز مشرف کے مستعفی ہونے کی افواہیں گردش کرتی رہیں۔ ان افوہوں میں تیزی اس وقت نظر آئی جب پی ٹی وی نے بھی ایسی افواہوں اور قیاس آرائیوں پر مبنی خبریں اور ان پر تبصرے نشر کرنا شروع کیے۔
صدر کے مستعفی ہونے کی خبروں سے جہاں سیاسی حلقوں میں بے چینی نظر آئی وہاں سٹاک مارکیٹ میں بھی مندی رہی۔