ہارون رشید بی بی سی اردو ڈاٹ کام، کوٹکئی، جنوبی وزیرستان

’ہم گھر میں ستر اسی لوگ ہیں۔ بچے ہر وقت روتے ہی رہتے ہیں‘

وزیرستان میں گزشتہ پانچ چھ برسوں کے دوران سب سے شدید لڑائی شاید گزشتہ چند ماہ میں محسود خطے میں ہوئی ہے۔ پورا علاقہ ہی نقل مکانی پر مجبور ہو گیا۔ سپنکئی رغزئی، کوٹکئی اور کالوروغہ جیسے کئی گاؤں دیکھتے ہی دیکھتے ویران ہوگئے۔

’سب تباہ ہو گیا‘  میں نے اپنے بھائی کے ساتھ خلیجی ممالک میں بیس برس تک جو کمائی کی تھی لا کر ان مکانات پر لگا دیئے۔ سب تباہ ہوگیا۔ سونا، بسترا، سامان سب تباہ ہوگیا۔ ایک کروڑ پندرہ بیس لاکھ کا نقصان میرے اندازے کے مطابق ہوا ہے علی خان

مقامی طالبان کے سربراہ بیت اللہ محسود کے جنگجوؤں کے ساتھ ہم بھی ان واپس لوٹنے والوں کے پاس پہنچے تو ان کی طرح ہم بھی بمباری سے مکانات کو پہنچنے والے نقصانات کو دیکھ کر حیران رہ گئے۔

شاید ہی اس علاقہ میں کوئی مکان ہو جسے نقصان نہ پہنچا ہو۔ قلعہ نما مٹی کے مکانات کی در و دیوار میں بڑے بڑے سوراخ اس علاقے پر گزرنے والے حالات کی عکاسی کر رہے تھے۔

	علی خان

انہوں نے بتایا کہ لڑائی کے آغاز پر جو جس نے پہنا ہوا تھا یا اٹھا سکتا تھا ساتھ لے کر وہاں سے نکل گیا۔ انہیں دوسرے روز پیچھے رہ جانے والے چچا زاد بھائی نے بتایا کہ ان کے مکان پر جیٹ طیاروں سے بمباری ہوئی ہے۔

واپسی پر انہیں رہائش کے مسئلے کے علاوہ کھانے پینے کی اشیاء کی کمی اور بجلی نہ ہونے جیسی مشکلات کا سامنا ہے۔ ’ہم گھر میں ستر اسی لوگ ہیں۔ بچے ہر وقت روتے ہی رہتے ہیں۔‘

انہیں امید تھی کہ ماضی کے برعکس اس مرتبہ حکومت نے کہا ہے تو شاید نقصان کا کچھ ازالہ ہو جائے۔

	گھروں کو واپسی

گل امیر، جو ہیں تو محکمہ صحت کے ڈسپنسر لیکن مشہور بطور ڈاکٹر ہیں کافی پریشان دکھائی دیے۔ ان کا حکومت سے مطالبہ تھا کہ ان کا نقصان جلد از جلد پورا کرے۔ ’حکومت نے خواہ مخواہ اسے تباہ کر دیا۔‘

گاؤں کے لوگوں نے بمباری میں استعمال ہونے والے اسلحے اور گولیوں کے خول سڑک کے کنارے جمع کر رکھے تھے۔

ہر کسی کی زبان پر ایک ہی بات تھی کہ یہ نقصان سکیورٹی فورسز کی بمباری سے ہوا۔ تاہم حکومت اور فوج ماضی میں کہتی رہی ہے کہ ان کی ہمیشہ کوشش رہی ہے کہ لڑائی یا کارروائی میں عام شہریوں کا نقصان کم سے کم ہو۔ تاہم جنگ تو جنگ ہے۔