عزیزاللہ خان
بی بی سی اردو ڈاٹ کام، کوئٹہ |  |
| | | بدھ کو حلف اٹھانے والے وزراء میں رقیہ ہاشمی، راحیلہ درانی اور سلیم کھوسہ شامل ہیں |
بلوچستان میں مسلم لیگ قائد اعظم سے تعلق رکھنے والے تین مزید اراکین کو کابینہ میں شامل کر لیا گیا ہے جس کے بعد اب وزراء کی تعداد چوالیس ہوگئی ہے۔ بلوچستان کابینہ میں ایک ماہ کے اندر دوسری مرتبہ توسیع کی گئی ہے۔ بدھ کو حلف اٹھانے والے وزراء میں قاف لیگ سے تعلق رکھنے والے اراکین رقیہ ہاشمی، راحیلہ درانی اور سلیم کھوسہ شامل ہیں۔ یاد رہے پہلے مرحلے میں اڑتیس وزراء پر مشتمل کابینہ تشکیل دی گئی تھی جس میں کچھ روز بعد توسیع کر کے تین وزراء کو شامل کیا گیا تھا اور اب اس نئے اضافے کے بعد وزراء کی تعداد چوالیس ہوگئی ہے۔ یہاں یہ امر قابل ذکر ہے کہ نئے تین وزراء سمیت بارہ وزراء کو تاحال کوئی محکمے نہیں دیے گئے ہیں اور صرف گاڑیاں فراہم کی گئی ہیں۔ بلوچستان حکومت اس وقت سٹیٹ بینک سے کوئی تیئس ارب روپے اوور ڈرافٹ لے چکی ہے جس پر ماہانہ پچیس کروڑ روپے تک سود ادا کیا جا رہا ہے۔ بلوچستان میں پینسٹھ اراکین کے ایوان میں اس وقت باسٹھ اراکین ہیں جن میں سے وزیراعلٰی نواب اسلم رئیسانی کو اکسٹھ اراکین کی حمایت حاصل ہے۔ نئے وزراء میں سے سلیم کھوسہ سابق دور میں جمہوری وطن پارٹی کی ٹکٹ پر منتخب ہوئے تھے لیکن ڈیرہ بگٹی میں فوجی آپریشن اور نواب اکبر بگٹی کی ہلاکت کے بعد انہوں نے قاف لیگ میں شمولیت اختیار کر لی تھی۔ پیپلز پارٹی کے ڈپٹی پارلیمانی لیڈر صادق عمرانی نے کابینہ میں توسیع پر سخت تشویش کا اظہار کیا ہے اور کہا ہے کہ انہیں اعتماد میں نہیں لیا گیا اس لیے وہ پیپلز پارٹی کی مرکزی کمیٹی کے اجلاس میں اس پر ضرور بات کریں گے۔ | 
قائد حزب اختلاف کا کمرہ بند
