عزیزاللہ خان بی بی سی اردو ڈاٹ کام، کوئٹہ

	صوبے کو درپیش مالی بحران ایک بڑا مسئلہ ضرور ہے لیکن بڑی کابینہ سے صوبے کی مالی صورتحال پر کوئی اثر نہیں پڑے گا:وزیر اعلیٰ

آج حلف اٹھانے والے اراکین میں مسلم لیگ نواز کے کیپٹن عبدالخالق اچکزئی، قاف لیگ کے سردار مسعود لونی اور پاکستان پیپلز پارٹی کے محمد امین عمرانی شامل ہیں۔ ان اراکین کے حلف اٹھانے کے بعد بلوچستان میں اس وقت باسٹھ اراکین کے ایوان میں اکتالیس وزیر ہو گئے ہیں جبکہ دو خواتین کو مشیر لیا گیا ہے۔ یہ حالیہ انتخابات کے بعد چاروں صوبوں اور وفاق میں قائم ہونے والی حکومتوں میں سب سے بڑی کابینہ ہے۔

اختلافات ایسی اطلاعات بھی ملی ہیں کہ محکموں کے حصول کے لیے اراکین میں اختلافات پائے جاتے ہیں جس کی ایک وجہ یہ ہے کہ ہر وزیر کی کوشش ہے کہ وہ اہم ترین وزارت حاصل کرے اور دوسرا یہ کہ اس وقت محکمے کم اور وزیر زیادہ ہیں اسلم رئیسانی

اب تک صرف چھبیس وزراء کو محکمے دے دیے گئے ہیں جبکہ دیگر کے بارے میں تاحال کوئی حتمی اعلان نہیں ہوا ہے۔ ایسی اطلاعات بھی ملی ہیں کہ محکموں کے حصول کے لیے اراکین میں اختلافات پائے جاتے ہیں جس کی ایک وجہ یہ ہے کہ ہر وزیر کی کوشش ہے کہ وہ اہم ترین وزارت حاصل کرے اور دوسرا یہ کہ اس وقت محکمے کم اور وزیر زیادہ ہیں۔

بلوچستان اس وقت مالی بحران کا شکار ہے اور سرکاری زرائع کے مطابق گزشتہ پانچ سالوں میں تقریباً تئیس ارب روپے کا اوور ڈرافٹ سٹیٹ بینک سے لیا گیا ہے جس پر ماہانہ کوئی پچیس کروڑ روپے تک بینک کو سود دیا جاتا ہے۔

وزیر اعلیٰ بلوچستان نواب اسلم رئیسانی کے مطابق صوبے کو درپیش مالی بحران ایک بڑا مسئلہ ضرور ہے لیکن بڑی کابینہ سے صوبے کی مالی صورتحال پر کوئی اثر نہیں پڑے گا کیونکہ بقول ان کے اس صوبے نے پانچ فوجی آپریشن برداشت کیے ہیں مالی مشکلات کیا چیز ہیں۔