عبدالحئی کاکڑ بی بی سی اردو ڈاٹ کام، پشاور

	کرم ایجنسی میں گزشتہ ایک سال کے دوران تین مرتبہ فرقہ وارانہ جھڑپیں ہوچکی ہیں

دوسری طرف حکومت نے کرم ایجنسی میں فریقین میں جھڑپوں کے دوران ہلاکتوں کے اعداد شمار جاری کرتے ہوئے کہا ہے کہ گزشتہ چند ماہ کے دوران ہونے والے فسادات میں مجموعی طور پر دو سو پانچ افراد ہلاک ہوئے۔

بدھ کو ضلع کوہاٹ کے رابطہ آفسر عمر خان آفریدی نے پریس بریفنگ کے دوران صحافیوں کو بتایا کہ گورنر سرحد اویس احمد غنی کی ہدایت پر سو رکنی گرینڈ جرگہ تشکیل دیدیا گیا جو علاقے میں پائیدار امن کی خاطر سنی اور شیعہ مسالک کے درمیان تمام متنازعہ امور کا حل نکالنے کی کوشش کرے گا۔

ان کے بقول جرگے میں دونوں مسالک کے پچیس پچیس افراد شامل کیے گئے ہیں جب کہ باقی پچاس عمائدین کاتعلق درہ آدم خیل، پانچ قبائلی ایجنسیوں اور ہنگو سے ہے ۔ان کے مطابق جرگہ دس مئی سے اپنے کام کا باقاعدہ آغاز کرے گا۔

عمر آفریدی کا کہنا تھا کہ اگر جرگہ فریقین کے درمیان مصالحت کرانے میں کامیاب ہوجاتا ہے تو آخری مرحلے میں شیعہ اور سنی مسالک سے تعلق رکھنے والے مذہبی اورسیاسی قائدین کو بھی شریک کیا جائے گا۔ان کے بقول حکومت نے فریقین سے دو دو کروڑ روپے نقد اور چار چار کروڑ روپے کی تحریری ضمانت بھی حاصل کرلی ہے۔

ہلاکتیں چھ سو سے زائد ہوئیں  گزشتہ چند ماہ کے دوران ہونے والی جھڑپوں میں دونوں طرف سے مجموعی طور پر چھ سو سے زائد افراد ہلاک ہوچکے ہیں جب کہ تقریباً ًپانچ ہزار افراد پارہ چنار سے نقل مکانی کرنے پر مجبور ہوئے ہیں فریقین

تاہم فریقین کا کہنا ہے کہ گزشتہ چند ماہ کے دوران ہونے والی جھڑپوں میں دونوں طرف سے مجموعی طور پر چھ سو سے زائد افراد ہلاک ہوچکے ہیں جب کہ تقریباً ًپانچ ہزار افراد پارہ چنار سے نقل مکانی کرنے پر مجبور ہوئے ہیں۔

اس سے پہلے بھی قبائلی علاقے کرم ایجنسی میں گزشتہ کئی سال کے دوران فرقہ ورانہ فسادات کے بعد حکومت کی طرف سے تشکیل پانے والوں جرگوں نےفریقین کے درمیان امن معاہدے کرائے ہیں مگر وہ پائیدار ثابت نہیں ہوسکے ہیں۔ تاہم یہ پہلی مرتبہ ہے کہ عددی اعتبار سے اتنا بڑا جرگہ تشکیل دیا جارہا ہے۔