عبدالحئی کاکڑ بی بی سی اردو ڈاٹ کام، پشاور

	’فریقین نے لوگوں کے گھروں کو آگ بھی لگائی ہے‘

ایجنسی کے صدر مقام پارہ چنار کے ایک رہائشی احمد فراز نے فون پر بی بی سی کو بتایا ہے کہ شہر کی سڑکوں پر اور گھروں میں لاشیں بکھری پڑی ہوئی ہیں اور اتنا موقع نہیں مل رہا ہے کہ انہیں اٹھا کر دفنا دیا جائے۔

ان کا کہنا ہے کہ چار روز کے دوران انہوں نے صرف مارٹر گولوں کی آوازیں، دھماکے، خوف اور موت کے اندوہناک مناظر دیکھے ہیں۔’ میں نے اپنے پندرہ ساتھیوں کی لاشیں دیکھی ہیں جن میں سے بعض میرے جگری دوست ہیں۔ زخمی ہونے والوں میں سے کئی جسم کے مختلف اعضاء سے محروم ہوگئے ہیں‘۔

احمد فراز کا مزید کہنا تھا کہ ’پاڑہ چنار میں لڑائی کے دوران فریقین نے لوگوں کے گھروں کو آگ بھی لگائی ہے اور اب بھی بعض دکانوں اور گھروں سے دھواں اٹھ رہا ہے۔علاقے میں مکمل افراتفری کا عالم ہے اور ہر شخص خوف اور گھبراہٹ کا شکار ہے‘۔

ان کے مطابق ’نقل مکانی کے تمام راستے مسدود ہیں اور ہمیں خوف ہے کہ کہیں نکلتے ہی گن شپ ہیلی کاپٹروں کی بمباری کا نشانہ نہ بنیں اور اگر وہاں سے بچ کر نکل بھی گئے تو کہیں فریقین کے ہاتھوں موت کے گھاٹ نہ اتر جائیں‘۔

احمد فراز کے بقول لڑائی کے دوران زخمی ہونے والی خواتین ، بچے اور دیگر افراد گھروں میں بے یارو مددگار پڑے ہیں جہاں انہیں طبی امداد فراہم کرنے کی سہولیات موجود نہیں ہیں۔ا ن کا کہنا تھا کہ ’چار دنوں سے بازار بند ہے لہذٰا لوگوں کے پاس اشیائے خورد و نوش تقریباً ختم ہوگئی ہیں، بجلی نہیں ہے جبکہ لوگوں کو پانی بھی میسر نہیں‘۔