ریاض سہیل بی بی سی اردو ڈاٹ کام، کراچی

	جاوید ہاشمی نے کہا ہے کہ نو اپریل کے واقعے کی عدالتی تحقیقات ہونی چاہیئں

جاوید ہاشمی نے کراچی میں جمعرات کی شام ایک پریس کانفرنس سے خطاب کرتے ہوئے کہا کہ عدلیہ کی بحالی کے لیے یہاں کی سول سائٹی اور وکلا نے گولیاں کھائیں اور جانوں کے نذرانے دیئے ہیں وہ یہاں انہیں خراج عقیدت پیش کرنے آئے ہیں۔

انہوں نے کہا کہ نو اپریل کے واقعے کی عدالتی تحقیقات ہونی چاہیئں اور جو ذمے دار ہیں انہیں سزا ملنی چاہیئے۔

وزارتوں سے الگ ہو جائیں گے  ججوں کی بحالی کے وعدے پر عمل ہوگا لیکن اگر صورتحال اس کے برعکس ہوئی تو مسلم لیگ ن اس جمہوری ماحول کو نقصان نہیں پہنچائی گی اور وزراتوں سے الگ ہوکر اپنا کردار ادا کرے گی مخدوم جاوید ہاشمی

مسلم لیگ ن کے رہنما کا کہنا تھا کہ متحدہ قومی موومنٹ اگر ججز کی بحالی پر ساتھ دے اور بارہ مئی اور نو اپریل کے واقعات کی تحقیقات کے نتائج کو قبول کرے تو انہیں ان کی حکومت میں شمولیت پر کوئی اعتراض نہیں ہے۔

ان کا کہنا تھا کہ ججوں اور دیگر معاملات پر اگر کسی کا عوام کے موقف کے برعکس موقف ہوگا تو ’میں عوام کی ترجمانی کروں گا۔‘

مخدوم جاوید ہاشمی نے کہا کہ عدلیہ کی بحالی پر مذاکرات جاری ہیں اور اس حوالے سے قوم کو جلد خوشخبری ملے گی۔ وہ وکلا کے اس موقف سے متفق ہیں کہ تیس اپریل تک ججوں کو بحال کرنا چاہیئے۔

ان کا کہنا تھا کہ مسلم لیگ ن نے یہ الیکشن اقتدار اور وزارتوں کے لیے نہیں لڑا ہے۔ ’جیل، جلاوطنی اور بینظیر بھٹو کی شہادت ملک میں جمہوریت کے لیے تھی۔‘

انہوں نے کہا کہ انہیں یقین ہے کہ ججوں کی بحالی کے وعدے پر عمل ہوگا لیکن اگر صورتحال اس کے برعکس ہوئی تو مسلم لیگ ن اس جمہوری ماحول کو نقصان نہیں پہنچائی گی اور وزراتوں سے الگ ہوکر اپنا کردار ادا کرے گی۔

ججوں کی بحالی کے لیے جاری مذاکرات کے اہم مرحلے پر نواز شریف کی لندن اور آصف علی زرداری کی دبئی روانگی پر انہوں نے تبصرہ کرنے سے انکار کر دیا۔ اس سے قبل انہوں نے طاہر پلازہ کا بھی دورہ کیا جہاں نو اپریل کو پانچ افراد کو زندہ جلایا گیا تھا۔