ہارون رشید بی بی سی اردو ڈاٹ کام، اسلام آباد

	ججوں کی بحالی سے متعلق کمیٹی کا ایک اجلاس جمعہ کی شام متوقع ہے

وکلاء اور ججوں کی بحالی کے منتظر دیگر طبقے توقع کر رہے تھے کہ حکومت اس اجلاس میں ججوں سے متعلق قرارداد پیش پیش کر دے گی لیکن ایسا کچھ بھی نہیں ہوا۔ البتہ حکومت کا کہنا ہے کہ ایوان کا اجلاس کسی بھی وقت دوبارہ طلب کیا جا سکتا ہے۔

مسلم لیگ (ن) کے رکن اسمبلی ایاز امیر کا کہنا ہے کہ اجلاس کے التواء سے ظاہر ہوتا ہے کہ تیس اپریل کی ڈیڈلائن ہاتھ سے نکل گئی ہے۔

حکمراں اتحاد کی ججوں سے متعلق کمیٹی کا ایک اور اجلاس جمعہ کی شام پارلیمنٹ ہاؤس میں متوقع ہے جس میں ججوں کی بحالی سے متعلق قرارداد اور آئینی پیکج پر دوبارہ غور کیا جائے گا۔ تاہم مبصرین کے خیال میں قومی اسمبلی کے اجلاس کے التواء سے ظاہر ہوتا ہے کہ اس معاملے پر ابھی اتفاق رائے نہیں ہو سکا ہے۔

اگر کوئی معاملہ خوش اسلوبی سے حل ہو رہا ہو تو اس میں دو چار دن کی تاخیر کوئی بڑی بات نہیں۔ خواجہ آصف

اسمبلی اجلاس کے بعد مسلم لیگ (ن) کے وفاقی وزیر پیٹرولیم خواجہ آصف نے صحافیوں سے بات کرتے ہوئے کہا کہ یہ التواء کوئی حربہ نہیں ہے بلکہ اس معاملے میں حکومت کو عملی مشکلات درپیش ہیں۔ ان کا کہنا تھا کہ کوئی جماعت بھی اس معاملے کو طول نہیں دینا چاہتی کیونکہ یہ ان سب کے لیے مشکل ہوگا۔

خواجہ آصف کا کہنا تھا کہ اگر کوئی معاملہ خوش اسلوبی سے حل ہو رہا ہو تو اس میں دو چار دن کی تاخیر کوئی بڑی بات نہیں۔ خواجہ آصف نے کمیٹی میں زیر غور معاملات اور اختلافات پر بات کرنے سے انکار کیا اور اس سوال کے جواب میں کہ ججوں والی کمیٹی کب تک متفقہ فیصلے پر پہنچ جائے گی ان کا کہنا تھا کہ وہ سیاستدان ہیں نجومی نہیں۔