عبادالحق بی بی سی اردو ڈاٹ کام،لاہور

	کراچی ہلاکتوں کا الزام صدر مشرف اور ان کے اتحادیوں پر عاید کیا گیا

وکلاء کی تنظیموں نے یہ مطالبہ عدلیہ کی بحالی کے لیے ہفتہ وار احتجاج کے سلسلہ میں ہونے والے اجلاسوں میں کیاہے۔ پنجاب بار کونسل نے کراچی میں ہونے والی ہلاکتوں پر تین روزہ سوگ کا اعلان بھی کیا ہے۔

کراچی کے واقعات پر لاہور میں احتجاج

کراچی: وکلاء میں تصادم

کراچی: بار کے رہنما کا گھر بھی نذرِ آتش

لاہور ہائی کورٹ بار ایسوسی ایشن کے اجلاس میں متفقہ طور پر منظور کی گئی ایک قرارداد میں ایم کیو ایم کو ایک دہشت گرد قرار دینے کا مطالبہ کیاگیا۔

لاہور کی ضلعی بار ایسوسی ایشن نے بھی ایک قرارداد کے ذریعے کراچی میں ہونے والی ہلاکتوں کا الزام صدر پرویز مشرف، ایم کیو ایم قائد الطاف حسین، گورنر سندھ عشرت العباد اورایم کیو ایم کے مرکزی رہنما فاروق ستار پر عائد کیا اور ان کے خلاف چوبیس گھنٹوں میں قتل کے الزام میں مقدمہ درج کرنے کا مطالبہ کیاہے۔

	وکلاء جمعہ گیارہ اپریل سے چودہ اپریل تک سوگ منائیں گے اور احتجاجی طور پر عدالتوں میں پیش نہیں ہونگے۔

لاہور بار ایسوسی ایشن کا جلوس ایوان عدل سے شروع ہوا اور جب یہ جلوس لاہور ہائی کورٹ کےسامنے پہنچا تو اس جلوس میں ہائی کورٹ بار کے وکلاء بھی شامل ہوگئے۔ جلوس اور مظاہروں میں سیاسی جماعتوں کے کارکن اور سول سوسائٹی کے ارکان نے بھی شرکت کی۔

جلوس میں شامل وکلاء نے ایم کیو ایم کے خلاف نعرے گائے۔ مظاہرین نے کتبے اور بینرز اٹھا رکھے تھے جن پر صدر پرویز مشرف اور ایم کیو ایم کے خلاف نعرے درج تھے۔ وکلاء پنجاب اسمبلی کے سامنے اپنے رہنماؤں کے خطاب کے بعد پُرامن طور پر منتشر ہوگئے۔

پنجاب بارکونسل کے وائس چیئرمین اسلم سندھو نے ایک پریس کانفرنس میں اعلان کیا کہ صوبے بھر کے وکلاء جمعہ گیارہ اپریل سے چودہ اپریل تک سوگ منائیں گے اور احتجاجی طور پر عدالتوں میں پیش نہیں ہونگے۔

ان کا کہنا ہے کہ صوبے بھر میں بار ایسوسی ایشنوں کی عمارتوں پر سیاہ پراچم لہرائے جائیں گے جبکہ وکلاء بازووں پر کالی پٹیاں باندھیں گے۔

اسلم سندھو نے یہ بھی اعلان کیا کہ گیارہ اپریل کو پنجاب بھر میں بار ایسوس ایشنوں کی سطح پر کراچی میں ہلاک ہونے والوں کی غائبانہ نماز جنازہ ادا کی جائے گی۔

قبل ازیں سپریم کورٹ بار ایسوسی ایشن کے عہدیداروں نے بار کے مستعفی ہونے والے صدر اعتزاز احسن سے مطالبہ کیا ہے کہ وہ دو دنوں میں اپنا استعفی واپس لیں۔

	جلوس اور مظاہروں میں سیاسی جماعتوں کے کارکن اور سول سوسائٹی کے ارکان نے بھی شرکت کی

ان کے بقول پاکستان کی دیگر وکلاء تنظیموں کے عہدیداروں نے بھی یہ اپیل کی ہے کہ اعتزاز احسن اپنا استعفی واپس لیں۔

ادھر صوبہ سرحد میں بھی وکلاء نے احتجاج کرتے ہوئے ہڑتال کی اور احتجاجی جلوس نکالے۔ پشاور میں بار ایسوسی ایشن کے اجلاس میں کراچی میں ہونے والی ہلاکتوں کی شدید مذمت کی گئی اور اس کی واقعہ کی ذمہ داری کا الزام ایم کیو ایم پر عائد کیا۔

ملک کے دیگر شہروں کی طرح کوئٹہ میں بھی وکلاء نے احتجاج میں حصہ لیتے ہوئے عدالتوں کا بائیکاٹ کیا اور ضلع کہچری سے جلوس نکالا جو شہر کے مختلف علاقوں سے ہوتا ہوا کہچری پہنچ کر ختم ہوا۔