ریاض سہیل، ارمان صابر بی بی سی اردو ڈاٹ کام، کراچی

	سپیکر اور ڈپٹی سپیکر کے لیے کاغذات نامزدگی اتوار کی دوپہر جمع کرائے جائیں گے

سندھ: شور شرابے میں حلف برداری

سندھ اسمبلی کا افتتاحی اجلاس: تصاویر میں

متحدہ قومی موومنٹ کی رابطہ کمیٹی کے اجلاس کے بعد ایم کیو ایم نے بھی دونوں عہدوں پر امیدوار نہ کھڑے کرنے کا اعلان کیا ہے۔

ایم کیو ایم کے رہنما بابر غوری کا کہنا تھا کہ عہدوں کی خاطر قومی مفاہمت میں رخنہ نہیں پڑنا چاہیے۔

ایم کیو ایم سپیکر اور ڈپٹی سپیکر کے لیے امیدوار نامزد نہیں کرے گی بلکہ پیپلز پارٹی کے امیدواروں کو ووٹ دے گی۔

ان کا کہنا تھا کہ ان کی جماعت نے ابھی تک غیر مشروط حمایت کر رہی ہے، کابینہ یا حکومت سازی کے حوالے کوئی بات نہیں ہوئی ہے۔

کس کس نے فارم حاصل کیے تھے  سپیکر اور ڈپٹی سپیکر کے لیے صرف پیپلزپارٹی، متحدہ قومی موومنٹ اور عوامی نیشنل پارٹی نے نامزدگی فارم حاصل کیے تھے۔ جب کہ مسلم لیگ ق، مسلم لیگ فنکشنل اور نیشنل پیپلز پارٹی نے فارم حاصل نہیں کیے

عوامی نیشنل پارٹی نے بھی پیپلز پارٹی کے دونوں امیدواروں کی حمایت کا اعلان کیا ہے، جماعت کے صوبائی صدر شاہی سید کا کہنا ہے کہ انہوں نے ڈپٹی سپیکر کے لیے ایم کیو ایم کا راستے روکنے کے فارم حاصل کیے تھے۔

ان کا کہنا تھا کہ انہیں محسوس ہوا تھا کہ پیپلز پارٹی ایم کیو ایم کو ڈپٹی سپیکر کا عہدہ دے رہی ہے، اس لیے پارٹی نے فیصلہ کیا کہ ڈپٹی سپیکر بلا مقابلہ نہیں آنا چاہیے اس لیے انتخاب لڑنا چاہیے۔ اب اگر پیپلز پارٹی ہی ڈپٹی سپیکر کا امیدوار لا رہی ہے تو امیدوار بلا مقابلے کامیاب ہوں گے مگر متحدہ کو یہ سعادت نصیب ہونے نہیں دیں گے۔

پیپلزپارٹی نے نثار کھوڑو کو سپیکر کے لیے نامزد کیا ہے جبکہ ڈپٹی سپیکر کے لیے اب تک کوئی نامزدگی سامنے نہیں آسکی ہے۔ اتوار کو دوپہر بارہ بجے دو عہدوں کے لیے کاغذات نامزدگی جمع کرائے جائیں گے اور شام کو حتمی امیدواروں کا اعلان کر دیا جائے گا اور پیر کو انتخاب ہوگا۔