شہزاد ملک بی بی سی اردو ڈاٹ کام ، اسلام آباد

	راولپنڈی میں وکلاء نے عدالتوں کو مکمل بائیکاٹ کیا

’صدر مشرف کا مواخذہ کیا جائے‘

بلوچستان میں بلیک فلیگ ڈے کے حوالے سے احتجاج

ہفتۂ سیاہ پرچم احتجاج

راولپنڈی میں ایک بڑا احتجاجی مظاہرہ ہوا جہاں پر راولپنڈی ڈسٹرکٹ بار اور لاہور ہائی کورٹ بار راولپنڈی بینچ کے وکلاء نے نہ صرف عدالتوں کا مکمل بائیکاٹ کیا بلکہ احتجاجی ریلی بھی نکالی۔ یہ احتجاجی ریلی ڈسٹرکٹ بار سے شروع ہوئی جو راولپنڈی پریس کلب پر جاکر ختم ہوئی۔

ہفتہ سیاہ پرچم، پیر کو بھی احتجاج جاری:تصاویر

مظاہرین نے ہاتھوں میں بینرز اور پلے کارڈ بھی اُٹھا رکھے تھے جس پر آزاد عدلیہ کے حق میں اور صدر جنرل ریٹائرڈ پرویز مشرف کے خلاف نعرے درج تھے۔

مظاہرین نےمعزول چیف جسٹس افتخار محمد چوہدری سمیت پی سی او کے تحت حلف نہ اٹھانے والے ججوں کی بحالی کے حق میں نعرے لگا ئے۔

وکلاء برادری نے اتوار کے روز پاکستان پیپلز پارٹی اور مسلم لیگ نواز کے رہنماوں کے درمیان ججوں کی بحالی کے معاہدے کا خیر مقدم کرتے ہوئے ان کے حق میں نعرے لگائے۔

	وکلاء نے ضلع کچہری میں احتجاجی مظاہرہ کیا

انہوں نے کہا کہ فوجی ڈکٹیٹر نے اپنے اقتدار کو طول دینے کی غرض سے ملک میں ایمرجنسی کا نفاذ کر کے چیف جسٹس سمیت دیگر ججوں کو نہ صرف ان کے عہدوں سے ہٹا دیا گیا بلکہ ان کو گھروں میں نظر بند کر دیا گیا۔

انہوں نے کہا کہ پاکستان شائد دنیا کا واحد ملک ہے جہاں پر عدلیہ کو قید کردیا گیا ہے اور اس اقدام کی وجہ سے ملک کی دنیا بھر میں جگ ہنسائی ہوئی ہے۔

سردار عصمت اللہ نے اتوار کے روز معزول چیف جسٹس افتخار محمد چوہدری کے گھر کےقریب مظاہرین پر پولیس اہلکاروں کی طرف سے آنسو گیس کی شیلنگ اور لاٹھی چارج کی سخت مذمت کرتے ہوئے کہا کہ ذمہ دارا پولیس افسران کے خلاف سخت کارروائی ہونی چاہیے۔

انہوں نے کہا کہ وکلاء برادری نے معزول چیف جسٹس کو ان کے گھر میں نظر بند کرنے کے خلاف تھانہ سیکریٹریٹ میں صدر جنرل ریٹائرڈ پرویز مشرف، وزیر داخلہ ، سیکرٹری داخلہ اور اسلام آباد کی ضلعی انتظامیہ اور پولیس کے اعلی حکام کے خلاف درخواست دی ہوئی ہے اور اگر آئندہ چند روز میں اس پر کوئی کارروائی نہ ہوئی تو وہ ڈسٹرکٹ اینڈ سیشن جج کی عدالت میں دعوی دائر کریں گے۔

اسلام آباد میں بھی وکلاء نے ضلع کچہری میں احتجاجی مظاہرہ کیا۔