عبدالحئی کاکڑ بی بی سی اردوڈاٹ کام، پشاور

	حملوں اور بم دھماکوں کا جو سلسلہ بظاہر رک گیا تھا وہ پھر سے شروع ہوگیا ہے

ایک پولیٹیکل اہلکار نے بی بی سی کو بتایا کہ سنیچر کی صبح تقریبا ًسوا دس بجے صدر مقام خار سے چند کلومیٹر کے فاصلے پر واقع راغہ ڈاگ کے مقام پر لیویز کے اہلکاراپنی گاڑی میں معمول کے گشت پر تھے کہ ایک مبینہ خودکش بمبار نے بارود سے لدی گاڑی ان کی گاڑی سےٹکرا دی۔

ان کے بقول اس واقعہ میں لیویز کا ایک صوبیدار اور ایک عام شہری ہلاک جبکہ آٹھ اہلکاروں اور دس عام شہریوں سمیت اٹھارہ افراد زخمی ہوگئے ہیں۔

انہوں نے مزید بتایا کہ زخمیوں کو طبی امداد فراہم کرنے کیے لیےخار سول ہسپتل منتقل کردیا گیا ہے جہاں پر چند دیگر افراد کی حالت تشویشناک بتائی جارہی ہے۔

واضح رہے کہ گزشتہ دو روز کے دوران قبائلی علاقہ اور صوبہ سرحد میں سکیورٹی فورسز کو نشانہ بنائے جانے کا تیسرا واقعہ ہے جس میں حکام کے کے مطابق دو مبینہ خودکش حملے بھی شامل ہیں۔اٹھارہ فروری کے انتخابات کے دوران خودکش حملوں اور بم دھماکوں کا جو سلسلہ بظاہر رک گیا تھا وہ پھر سے شروع ہوگیا ہے۔