ریاض سہیل بی بی سی اردو ڈاٹ کام ، کراچی

	’ہماری قائد اور سیاسی قلندر ہمیں سب کچھ سکھا گئی ہیں‘

ستائیس دسمبر کو بینظیر بھٹو کی ہلاکت کے بعد پاکستان پیپلز پارٹی نے اپنی انتخابی مہم معطل کردی تھی۔

پارٹی کے شریک چیئرمین آصف علی زرداری نے ٹھٹہ میں منعقد پہلے جلسہ عام کوخطاب کرتے ہوئے کہا ہے کہ انہوں نے یہ کبھی بھی نہیں سوچا تھا کہ بینظیر بھٹو کو کچھ ہوگا۔ انہوں نے کہا کہ یہ خیال انہیں اٹھارہ اکتوبر کو کراچی میں ان کے جلوس میں بم حملے کے بعد پیدا ہوا۔

جلسے کو مخدوم امین فہیم سمیت دیگر مرکزی رہنماؤں نے بھی خطاب کیا۔

آصف زرداری کے مطابق انہوں نے بینظیر بھٹو کو ٹیلیفون کرکے کہا کہ یہ آپ کے نہیں پاکستان کے دشمن ہیں، آپ اپنا خیال رکھیں۔ بلاول ہاؤس، دبئی یا لندن میں بیٹھے کر سیاست کریں دیگر سیاستدان بھی تو ایسا کر رہے ہیں مگر بینظیر کا کہنا تھا کہ عوام ان کے شیدائی ہیں اور وہ ان سے دور نہیں رہے سکتیں۔

	ٹھٹھ شہر میں پی پی پی کا جلوس

انہوں نے کہا کہ بینظیر بھٹو کی تربیت ذوالفقار علی بھٹو نے کی تھی اور بلاول کی تربیت بینظیر نے کی ہے۔ ’وہ اپنے بچوں کو چھوڑ کر پاکستان کے بچوں کے پاس آئی تھی، ہم بھٹو کے فرزند ہیں پھانسیوں اور قید سے نہیں ڈرتے ہیں۔ ہم تو کہتے ہیں کہ یہ تیز ہوائیں اس لیے تیز چلتی ہیں کہ ہمیں اونچا اڑا سکیں‘۔

آصف علی زرداری نے جلسے کو بتایا کہ وہ گزشتہ روز سیہون شریف گئے تھے جہاں انہوں نے قلندر شھباز سے دعا مانگی کے ’انہیں سیاسی عقل اور طاقت کی ضرورت ہے، سترہ کروڑ عوام کا بوجھ ان کے بازوں پر ہے انہیں پاکستان بچانا ہے‘۔

حکمرانوں کو مخاطب ہوتے ہوئے پیپلز پارٹی کے شریک چیئرمین نے کہا کہ ان کے پاس کسی مسئلے کا حل نہیں ’ہمارے پاس تمام حل موجود ہے، ہماری قائد اور سیاسی قلندر ہمیں سب کچھ سکھا گئی ہیں‘۔

آصف زرداری نے میڈیا سے یکجہتی کا اظہار کرتے ہوئے کہا کہ ’تم ٹیلیویژن بند کرنا جانتے ہو، ہم کھولنا چاہتے ہیں، ہم تقدیر بنانا جانتے ہیں، تم گولیاں چلانا جانتے ہو ہم قربانیاں دینا جانتے ہیں‘۔

قومی شاہراہ پر واقعہ ٹھٹہ شہر کے مرکز میں یہ جلسہ منقعد کیا گیا تھا، جس میں حیدرآباد، بدین، دادو سمیت دیگر اضلاع سے بھی لوگوں نے شرکت کی۔