حکومتی کارروائیوں کا دائرہ غیرملکی صحافیوں تک پھیلتا نظر آ رہا ہے

تاہم وزارت داخلہ کے ترجمان بریگیڈئر (ریٹائرڈ) جاوید اقبال چیمہ نے شمڈل کو ملک بدر کرنے کی تردید کی ہے۔ ان کا کہنا ہے کہ ’شمڈل اپنی مرضی سے پاکستان چھوڑ کرگئے ہیں اور ان کی ملک بدری کوئی حکم جاری نہیں کیا گیا۔‘

شمڈل نے نیو یارک ٹائمز میگزین میں ’نیکسٹ جنریشن طالبان‘ کے عنوان سے مضمون لکھا تھا۔

اگرچہ غیر ملکی صحافی ایسی کارروائیوں کی زد میں کم ہی آتے ہیں، تاہم حالیہ دنوں میں ایسے کچھ واقعات سامنے آئے ہیں۔ نومبر میں ایمرجنسی لگنے کے بعد تین برطانوی اخبار نویسوں کو اس وقت ملک چھوڑنے کا حکم دیا گیا تھا جب انہوں نے اپنے اخبار میں صدر مشرف پر ایک تنقیدی اداریہ لکھا تھا۔

صحافتی حقوق کے عالمی ادارے کمیٹی ٹو پروٹیکٹ جرنلسٹس کا کہنا ہے کہ پاکستان میں اب تک مقامی میڈیا ہی حکومتی زیادتیوں کا شکار تھا لیکن اب حکومتی کارروائیوں کا دائرہ کار غیرملکی صحافیوں تک پھیلتا نظر آ رہا ہے۔

شمڈل کے ایک دوست کا کہنا ہے کہ بنیادی نقطہ یہ ہے کہ شمڈل کو ان کی رپورٹ کی وجہ سے ملک سے نکالا گیا ہے، اس لیے یہ میڈیا کی آزادی کا معاملہ ہے۔