رفعت اللہ اورکزئی بی بی سی اردو ڈاٹ کام، پشاور

	اے این پی اصولی سیاست سے پیچھے نہیں ہٹے گی: اسفندیار ولی (فائل فوٹو)

اتوار کو پشاور میں ایک اخباری کانفرنس میں انتخابی منشور کا اعلان کرتے ہوئے عوامی نیشنل پارٹی کے سربراہ اسفندیار ولی خان نے کہا کہ ان کی جماعت پارلمینٹ کی بالادستی اور عدلیہ اور میڈیا کی مکمل آزادی پر یقین رکھتی ہے۔ انہوں نے کہا کہ ’ اے این پی نے ہمیشہ ملک میں اصولوں کی سیاست کی ہے اور آئین وقانون کی بالادستی کے لیے آواز اٹھائی ہے اور آئندہ بھی اصولی سیاست سے پیچھے نہیں ہٹے گی۔‘

اے این پی کے سربراہ کا کہنا تھا کہ ان کی حکومت میں آتی ہے یا نہیں آتی ہے ، دونوں صورتوں میں برطرف کیے گئے ججوں کی بحالی اور آزاد عدلیہ کے قیام کےلیے کوششیں جاری رکھے گی۔

ایک سوال کے جواب میں اسفند یار نے کہا کہ کالا باغ ڈیم ایک مردہ ایشو ہے اس لیےاس پر بات کرنا اور اسے اچھالنا فضول ہے۔

اے این پی کی طرف سے جاری کردہ سات نکاتی انتخابی منشور کے مطابق امریکہ کے ساتھ دوستانہ تعلقات قائم کیے جائیں گے کیونکہ منشور کے مطابق اس سے پاکستان بڑا فائدہ حاصل کرسکتا ہے، جبکہ افغانستان اور چین سے دوستانہ تعلقات قائم کرنے پر بھی زور دیا گیا ہے۔

سات صفات پر مشتمل منشور میں جن چیزوں کو سب سے زیادہ اہمیت دی گئی ہے ان میں داخلی امور، سیاسی، قانونی اور انتظامی معاملات، جمہوریت اور قانون کی بالادستی، سماجی اور اقتصادی امور، روزگار، صنعتی ترقی، شہری ترقی، تعلیم، صحت، ماحولیات، علاقائی تجارت، پن بجلی کی پیدوار، امور خارجہ، قبائلی علاقہ جات، سیاسی تبدیلیاں اور ترقیاتی اصلاحات شامل ہیں۔

انتخابات میں سیاسی جماعتوں کے ممکنہ اتحاد کے حوالے سے مختلف سوالوں کا جواب دیتے ہوئے اسفند یار ولی نے واضح کیا کہ اے این پی کسی سیاسی اتحاد کا حصہ نہیں بنے گی اور نہ ہی پارٹی کے ضلعی رہنماؤں کو یہ اختیار حاصل ہے کہ وہ اپنے طور پر کسی جماعت سے سیٹ ٹو سیٹ ایڈجسٹمنٹ کریں۔