دلاور خان وزیر بی بی سی اردو ڈاٹ کام، ڈیرہ اسماعیل خان

	سکیورٹی فورسز کے قافلے پر کل تین جگہوں پر حملے ہوئے

زخمیوں کو ہیلی کاپٹر کے ذریعے بنوں منتقل کر دیاگیا ہے جہاں بعض کی حالت تشویش ناک بتائی جاتی ہے۔

شمالی وزیرستان میں پولیٹکل انتظامیہ کا کہنا ہے کہ بدھ کی شام کوئی پچیس گاڑیوں پر مشتمل سکیورٹی فورسز کا ایک قافلہ میرانشاہ سے رزمک جا رہا تھا کہ دوسلی کے قریب مقامی طالبان نے قریبی پہاڑوں سے قافلے کو نشانہ بنایا جس کے نتیجہ میں سکیورٹی فورسز کے چھ اہلکار ہلاک جبکہ تیس کے قریب زخمی ہوگئے۔

حکام کا کہنا ہے کہ حملے میں آٹھ گاڑیاں مکمل طور پر تباہ ہوگئی ہیں۔ حکام کے مطابق اس حملے سے پہلے اسی قافلہ پر ٹل کلے کے قریب دو مقامات پر حملے ہوئے جس میں دو گاڑیوں کو معمولی نقصان پہنچا لیکن کوئی جانی نقصان نہیں ہوا۔

حملے کے بعد سکیورٹی فورسز نے بھی جوابی کارروائی کی جس میں میرانشاہ اور میر علی میں کئی مشکوک ٹھکانوں کو نشانہ بنایا لیکن اس میں کسی جانی نقصان کی اطلاع نہیں ملی ہے۔

ان حملوں کی ذمہ داری مقامی طالبان نے قبول کی ہے۔ طالبان کے ترجمان احمداللہ احمدی نے دعوی کیا کہ حملہ میں سکیورٹی فورسز کے چالیس اہلکار ہلاک جبکہ کافی تعداد میں زخمی ہوئے ہیں۔

انہوں نے کہا کہ زخمیوں کو تین ہیلی کاپٹروں میں وہاں سے منتقل کر دیاگیا ہے۔ انہوں نے دھمکی دی کہ اگر حکومت نے شمالی وزیرستان سے فوجی چیک پوسٹوں کو ختم نہیں کیا تو ان کے حملے جاری رہیں گے۔