دلاور خان وزیر بی بی سی اردو ڈاٹ کام، ڈیرہ اسماعیل خان

	بنوں پاکستان کے قبائلی علاقے شمالی وزیرستان سے ملحقہ ضلع ہے

غیرملکیوں کے پاسپورٹ کے مطابق دو غیر ملکیوں کا تعلق آذربائیجان اور ایک کا تعلق ترکی سے ہے جبکہ مقامی باشندے بنوں کے رہائشی ہیں۔

بنوں پولیس کے سربراہ دار علی خٹک نے بی بی سی کو بتایا کہ یہ افراد پیر کو ایک ٹیکسی میں پشاور سے بنوں آ رہے تھے کہ بنوں شہر میں داخل ہونے سے مخبری پر تھانہ ٹاؤن شپ پولیس نے ناکہ بندی کر دی۔

پولیس کے سربراہ کے مطابق جب پولیس نے موٹر کار کو روکا اور کار میں سوار پانچوں افراد سے پوچھ گچھ کی تو معلوم ہوا کہ ان میں سے تین افراد اردو یا پشتو زبان نہیں بول سکتے۔ جب ان کی تلاشی لی گئی تو ان سے غیرملکی پاسپورٹ برآمد ہوئے جن پر ان کے نام اسمعیل ولد رحمت سکنہ استنبول ترکی الوین عباس ولد یاور توفیق اوگلو اور میر احد ولد امیر اسمعیل آذربائیجان لکھا ہوا ہے۔

تھانہ ٹاؤن شیپ پولیس نے تینوں غیر ملکیوں کے خلاف چودہ فارن ایکٹ کے تحت مقدمہ درج کرلیا ہے۔ پولیس کے سربراہ نے بتایا کہ تینوں غیر ملکیوں کو سول جج نمبر تین بنوں کی عدالت میں پیش کیا گیا جہاں جج نے غیرملکیوں کو جیل بھیجنے کا حکم دیا۔

یاد رہے کہ بنوں پاکستان کے قبائلی علاقے شمالی وزیرستان سے ملحقہ ضلع ہے جہاں مقامی طالبان نے گزشتہ چندہ ماہ میں کئی مرتبہ فوج سمیت قانون نافذ کرنے والے دیگر اداروں کے اہلکاروں پر حملے کیے گئے ہیں۔