سہیل حلیم بی بی سی اردو ڈاٹ کام، لندن

	عدلیہ کی بحال کے سوال پر نینظیر بھٹو اور نواز شریف میں اختلافات ہیں

لیکن کیا آپ صرف خبر میں ہی الجھ کر رہ جاتے ہیں؟ یا ’بٹوین دی لائنز‘ بھی پڑھتے ہیں؟ حسب ذیل سوالوں میں سے آپ کتنوں کا جواب دے سکتے ہیں؟ اپنی’ قابلیت‘ کا اندازہ خود ہی لگا لیجیے۔ زیادہ تر سوال گزشتہ چند دنوں میں ہماری ویب سائٹ پر شائع ہونے والی خبروں سے لیے گئے ہیں۔

(1) نواز شریف معزول چیف جسٹس افتخار محمد چودہری سے کیوں ملنا چاہتے ہیں؟

(a) یہ معلوم کرنے کے لیے کہ جب سابقہ عدلیہ بحال ہو تو پی سی او کے تحت حلف لینے والے ججوں کے ساتھ کیا سلوک کیا جائے؟
(b) یہ پوچھنے کے لیے کہ لیے جسٹس چودہری اپنی بحالی کے لیے سپریم کورٹ سے ہی کیوں رجوع نہیں کرتے؟
(c) یہ پوچھنے کے لیے کہ سپریم کورٹ پر نواز لیگ کے کارکنوں کا حملہ زیادہ اچھا/موثر تھا یا صدر مشرف کا؟
(d) ان میں سے کوئی نہیں، بس ویسے ہی، بہت دنوں سے کسی جج سے ملاقات جو نہیں ہوئی تھی۔

(2) صدر مشرف فوج کے سربراہ کا عہدہ چھوڑنے کے باوجود آرمی ہاؤس خالی کرنےسے کیوں انکار کر رہے ہیں؟

(a) کیوں کہ آرمی ہاؤس سے ان کی( بچپن کی) یادیں وابستہ ہیں۔
(b) کیوں کہ وہ اب بھی فوج کے سربراہ ہیں یا سمجھتے ہیں کہ وہ ہیں۔
(c) کیونکہ وردی اتر گئی پر۔۔۔
(d)تاکہ ایوان صدر اور آرمی ہاؤس میں سے ایک مکان کرائے پر دیا جاسکے۔

	جوہری ہتھیار نہیں بنا رہے تو کیا خاص بات ہے؟

(3) بینظیر بھٹو نے وطن واپسی کے بعد کہا کہ وہ حکومت سے ڈیل کرنے کے بجائے پاکستان کی جیلوں میں قید رہنا پسند کریں گی۔ آٹھ سال کی جلا وطنی کے بعد انہیں یہ خیال کیوں آیا؟

(a) کیونکہ پہلے انہیں یہ معلوم نہیں تھا کہ پاکستان میں بھی جیلیں ہوتی ہیں۔
(b)انہیں معلوم نہیں تھا کہ وہ بد عنوانی کے معاملات میں مطلوب ہیں۔
(c)انہیں معلوم نہیں تھا کہ وہ بدعنوانی کے الزامات سے بچنے کے لیے بیرون ملک رہ رہی ہیں۔

(4) نواز شریف کہتے ہیں کہ گیدڑ کی سو سال کی زندگی سے شیر کی ایک دن کی زندگی بہتر ہے۔ اس بات کا خیال انہیں کب آیا؟

(a) سعودی شاہی خاندان کے محل میں جلا وطنی قبول کرنے کے بعد۔
(b)پاکستان کی جیل میں کچھ وقت گزارنے کے بعد لیکن انہوں نے یہ بات اپنے سینے میں چھپائے رکھی۔
(c)ان میں سے کوئی نہیں کیونکہ (انہیں اب بھی دونوں میں فرق نہیں معلوم)

(5)امریکہ کی سولہ انٹیلی جنس ایجنسیوں کا متفقہ خیال ہے کہ ایران نے جوہری ہتھیار بنانے کا منصوبہ کئی سال پہلے ہی ترک کر دیا تھا۔ وہ اس نتیجے پر
کیسے پہنچے؟

(a) وہ ایران کے صدر احمدی نژاد کی بات پر بھرپور بھروسہ کرتے ہیں جو ہمیشہ سے یہ ہی دعویٰ کرتے آرہے تھے۔
(b) وہ عراق میں رسوائی کے بعد اس نتیجے پر پہچے ہیں کہ جوہری ہتھیار ہوتے ہی نہیں، لہذا کوئی انہیں بنا بھی نہیں سکتا۔
(c)ان کو یہ بات پہلے سے ہی معلوم تھی، بس ایران سے تھوڑی تفریح کر رہے تھے۔

(6) یہ معلوم ہوجانے کے باوجود کے ایران جوہری ہتھیار نہیں بنا رہا، صدر جارج بش اس بات پر کیوں مصر ہیں کہ ایران کے خلاف مزید پابندیاں عائد کی جائیں۔

(a) تاکہ ایران کو بم نہ بنانے کی سزا دی جاسکے۔
(b)تاکہ ایران مشتعل ہوکر جوہری بم بنانے کا پروگرام دوبارہ شروع کر دے۔
(c)کیونکہ صدر بش کبھی کوئی کام ادھورا نہیں چھوڑتے، اگر کسی کو برباد
کرنا ہے تو کوئی کثر نہ چھوڑی جائے۔