ذوالفقار علی بی بی سی اردو ڈاٹ کام، اسلام آباد

	حمزہ کیمپ کے راستے کو دھماکے کے بعد عام ٹریفک بند کر دیا گیا ہے

راولپنڈی میں جی ایچ کیو کے داخلی دروازے پر فوجیوں کے علاوہ پولیس کمانڈوز بھی تعینات کیےگئے ہیں اور اس طرف جانے والی سڑک کو بند کر کے مسلح فوجی تعینات کر دیے گئے ہیں۔

راولپنڈی: دو خود کش حملے، تیس ہلاک

فوج پر خود کش حملے تصاویر میں

حمزہ کیمپ کے تباہ ہونے والے مرکزی گیٹ پر قنات لگی ہوئی ہے۔

یہ حمزہ کیمپ پہلے اوجڑی کیمپ کہلاتا تھا اور یہاں آئی ایس آئی کے دفاتر اور ان کے اہلکاروں کی رہائش گاہیں ہوتی تھیں۔

اوجڑی کیمپ یا حمزہ کیمپ کی ایک تاریخی حثیت بھی ہے اور سن اسی کی دہائی میں افغان جہاد کے لیے یہ اسلحہ فراہم کرنے والا بڑا مرکز تھا جس میں دس اپریل انیس سو اٹھاسی کو پراسرار دھماکے ہوئے اور سینکڑوں راکٹ اور گولے اسلام آباد تک میں آ کر گرے۔ ان دھماکوں سرکاری طور سو ہلاکتوں اور سینکڑوں کے زخمی ہونے کا اعلان کیا گیا تھا۔

اس کے فوراً بعد اس وقت کے وزیراعظم محمد خان جونیجو نے ان دھماکوں کی تحقیقات کرائیں جن کہا جاتا ہے کہ سینئر فوجی افسروں کو ذمہ داری قرار دیا گیا لیکن ان تحقیقات کے فوراً بعد جونیجیو کی حکومت کو جنرل ضیاءالحق نے برطرف کردیا۔

	سروس روڈ کو دونوں جانب بند کر کے مسلح پولیس بھی تعینات کی گئی

وہاں موجود ایک مریض کے ساتھ آئے ہوئے شخص نے کہا کہ ’پہلےگاڑی اندر لے جانے دیتے تھے لیکن آج اس کی اجازت نہیں دے رہے ہیں‘۔ لیکن اسپتال کے باہر صورت حال معمول کے مطابق تھی۔

جی ایچ کیو اور حمزہ کیمپ پر خود کش حملوں کے بعد اگرچہ راولپنڈی میں زندگی معمول کے مطابق چل رہی ہے اور روز کی طرح سڑکوں پر گاڑیاں رواں دواں ہیں۔ لیکن لوگوں کو تشویش ہے اور وہ کہتے ہیں کہ ملک کی صورت حال روز بروز بگڑتی جارہی ہے ۔ بعض لوگ اس کا ذمہ دار حکمرانوں کو سمجھتے ہیں۔