شہزاد ملک بی بی سی اردو ڈاٹ کام، اسلام آباد

حمزہ کیمپ فیض آباد کے قریب مری روڈ پر واقع ہے جسے دھماکے کے بعد عام ٹریفک بند کر دیا گیا

راولپنڈی پولیس کے ایک اعلٰی افسر نے نام ظاہر نہ کرنے کی شرط پر بی بی سی کو بتایا کہ دونوں دھماکوں میں تیس افراد مارے گئے ہیں۔

فوج پر خود کش حملے تصاویر میں

حمزہ کیمپ (سابقہ اوجڑی کیمپ) میں ہونے والے خود کش حملے کا نشانہ حساس ادارے کی ایک بس بنی جس کے عقب میں آنے والی ایک اور گاڑی اس سے ٹکرانے کے بعد دھماکے سے پھٹ گئی جس سے بس کو آگ لگ گئی۔ راولپنڈی کے علاقے فیض آباد میں واقع حمزہ کیمپ میں پاکستان کی خفیہ ایجنسی آئی ایس آئی کے دفاتر اور اس کے اہلکاروں کی رہائشگاہیں ہیں۔

چشم دیدگواہوں کے مطابق حملے کا نشانے بننے والی بس جب کیمپ کے اندر داخل ہوئی تو ایک چھوٹی گاڑی بھی اس کے پیچھے اندر چلی گئی، پھر زوردار دھماکہ ہوا اور بس کو آگ لگ گئی۔خود کش حملے کا نشانہ بننے والی بس بری طرح جل چکی ہے اور ہلاکتوں کی تعداد میں اضافے کا امکان ہے۔ ایک عینی شاہد کے مطابق جس وقت یہ دھماکہ ہو تو اس وقت گاڑی میں چالیس سے زائد افراد سوار تھے اور ہلاک ہونے والے افراد کی لاشیں قابل شناخت نہیں رہیں۔

دھماکہ اس قدر شدید تھا کہ اس کی آواز دور تک سنائی دی۔ دھماکے سے قریبی عمارتوں کے شیشے اور اس وقت سڑک سے گزرنے والی گاڑیوں کے شیشے ٹوٹ گئے ۔ دھماکے کے بعد فوج کے اہلکاروں نے تمام علاقے کو گھیرے میں لے لیا اور اسلام آباد کی طرف جانے والی سڑک کو ٹریفک کے لیے بند کر دیا۔

اس واقعہ کے بعد پولیس اور ایف آئی اے کے سپیشل انویسٹیگیشن گروپ کے اہلکار جائے وقوعہ پر پہنچ گئے اور انہوں نے وہاں سے شواہد اکھٹے کیے۔

	حمزہ کیمپ میں خفیہ ایجنسی آئی ایس آئی کے دفاتر اور اس کے اہلکاروں کی رہائشگاہیں ہیں۔

دھماکے کے بعد جب مختلف ہسپتالوں کی ایمبولنس گاڑیاں وہاں پہنچیں تو موقع پر تعینات فوجی اہلکاروں نے انہیں کیمپ کے اندر جانے کی اجازت نہیں دی اور صرف فوج کی ایمبولنس گاڑیوں کو لاشیں اُٹھانے کی اجازت دی گئی۔

پولیس ذرائع کے مطابق بیالیس تابوت اوجڑی کیمپ میں بھیجے گئے ہیں اور اس واقعہ میں ہلاک ہونے والے کسی شخص کی لاش کو جی ایچ کیو نہیں بھیجا گیا۔

دوسرا دھماکہ جی ایچ کیو کے داخلی دروازے کے پاس ہوا جس میں ایک شدت پسند نے اپنی گاڑی چیک پوسٹ سے ٹکرا دی جس سے شدت پسند سمت دو افراد ہلاک ہوگئے۔ پولیس اہلکاروں نے اوجڑی کیمپ کے قریبی علاقے کی چھان بین کے دوران ایک مارٹر گولہ بھی ملا جسے بم ڈسپوزل سکواڈ نے ناکارہ بنا دیا۔

ان دھماکوں کی کوریج کے لیے جب میڈیا کے لوگ وہاں پہنچے تو حساس اداروں کے اہلکاروں نے ان سے کیمرے چھین لیے۔

بتایا جاتا ہے کہ جی ایچ کیو کے پاس ہونے والے خودکش حملے میں شدت پسند کا چہرہ قابل شناخت ہے۔ ان خودکش حملوں کے بعد ڈائریکٹر جنرل آئی ایس آئی اور ڈی جی ملٹری انٹیلی جنس نے جائے وقوعہ کا دورہ بھی کیا ہے۔

واضح رہے کہ گزشتہ دو ماہ کے دوران راولپنڈی میں پاکستانی فوج پر پانچ خودکش حملے ہوئے ہیں جن میں ساٹھ سے زائد افراد ہلاک ہو چکے ہیں۔ ہلاک ہونے والوں میں ذیادہ تعداد فوجی اہلکاروں کی ہے اور قانون نافذ کرنے والے ادارے تاحال ان حملوں کا سراغ نہیں لگا سکے۔