علی سلمان بی بی سی اردو ڈاٹ کام، لاہور

تین نومبر کے بعد سے پنجاب کے صحافی احتجاجاً بازوں پر کالی پٹیاں باندھ کر کام کررہے ہیں اور پریس کلبوں پر سیاہ پرچم لہرائے جارہے ہیں۔

دریں اثناء کراچی میں صحافیوں پر تشدد کے خلاف احتجاج کرنے والے فیصل آباد کے جرنلسٹوں پر بدھ کو پولیس نے لاٹھی چارج کیا، آنسو گیس کے گولے داغے اور دس افراد کو گرفتار کر لیا پنجاب کے دیگر شہروں میں بھی صحافیوں کا احتجاج جاری رہا لیکن کسی دوسرے بڑے ناخوشگوار واقعہ کی اطلاع نہیں ملی۔

صحافیوں پر تشدد کی عالمی مذمت

عالمی حمایت  دنیا بھر کی تمام صحافتی تنظیمیں اس کڑے وقت میں پاکستانی صحافیوں کے ساتھ ہیں۔ آئی ایف جے کے نمائندے منی ڈکشٹ

ڈیڑھ سو کے قریب اخبارنویسوں فوٹوگرافروں اوردیگر افراد نےحکومت کے خلاف نعرے بازی کی۔وہ نعرےلگا رہے تھے کہ ’نامنظورنامنظور ایمرجنسی نامنظور، چودھری افتخار کو رہا کرو،مشرف کو پھانسی دو‘۔

فیصل آباد میں تشدد کا شکار ہونے والے صحافیوں نے بتایا کہ انہوں نے پر امن مارچ کی کوشش کی تو پولیس اہلکاروں نے ان پر حملہ کردیا، لاٹھیاں برسائیں، آنسو گیس کے گولے داغے اور دس افراد کو موقع پر حراست میں لیا گیا۔

	فیصل آباد میں صحافیوں کا احتجاج

ادھر لاہور میں انٹرنیشنل فیڈریشن آف جرنلسٹس یعنی آئی ایف جے کے ایک وفد نے لاہور پریس کلب میں بھوک ہڑتالی کیمپ کا دورہ کیا۔ اس موقع آئی ایف جے کے نمائندے کانک منی ڈکشٹ نے بی بی سی سے گفتگو کرتے ہوئے کہا کہ دنیا بھر کی تمام صحافتی تنظیمیں اس کڑے وقت میں پاکستانی صحافیوں کے ساتھ ہیں۔

مہذب دنیا  دنیاکے کسی مہذب ملک میں صحافیوں کے ساتھ ایسا سلوک روا نہیں رکھا جاتا جیسا کہ پاکستان میں حکومت نے رکھا ہوا ہے۔ ڈِکشٹ

انہوں نے کہا کہ دنیاکے کسی مہذب ملک میں صحافیوں کے ساتھ ایسا سلوک روا نہیں رکھا جاتا جیسا کہ پاکستان میں حکومت نے رکھا ہوا ہے۔ صحافیوں کی بین الاقوامی تنظیم کے عہدیدار نےپی سی او کو مسترد کیا اور کراچی،اسلام آباد اور دیگر مقامات پر صحافیوں پر تشدد اور پیمرا قوانین کی مذمت کی۔

انہوں نے کہا کہ وہ حکومت سے مطالبہ کرتے ہیں کہ ٹی وی چینلوں اورایف ایم ریڈیو کی نشریات بحال کی جائیں اور پاکستان میں انیس سو تہتر کے آئین کے ساتھ عدلیہ کو بحال کیا جائے۔

ملتان اور بہاولپور سمیت پنجاب کے دیگر شہروں سے بھی احتجاجی مظاہرے ہوئے ہیں۔ میڈیا پر پابندی کے خلاف صحافیوں کا احتجاج تیسرے ہفتے میں داخل ہوگیا ہے۔ تین نومبر کے بعد سے پنجاب کے صحافی احتجاجاً بازوں پر کالی پٹیاں باندھ کر کام کررہے ہیں اور پریس کلبوں پر سیاہ پرچم لہرائے جارہے ہیں۔