دلاور خان وزیر بی بی سی اردو ڈاٹ کام ڈیرہ، اسماعیل خان

	پاکستان کے قبائلی علاقوں میں تواتر کے ساتھ سکیورٹی فورسز پر حملے ہو رہے ہیں

مقامی حکام کا کہنا ہے کہ سکیورٹی فورسز کا تقریبا تیس سے زیادہ گاڑیوں پر مشتمل ایک قافلہ میرانشاہ سے بنوں کی طرف جارہا تھا کہ ایف آر بکاخیل کے مقام پر ایک گاڑی بارودی سرنگ سے ٹکرا گئی۔دھماکے میں فرنٹیئر کور کا ایک اہلکار عبدالستار ہلاک جبکہ دو زخمی ہوگئے ہیں۔

حکام کے مطابق زخمیوں کو بنوں میں واقع آرمی کے ایک ہسپتال کومنتقل کردیا گیا ہے۔مقامی لوگوں کے مطابق واقعہ کے فوراً بعد سکیورٹی فورسز نے فائرنگ شروع کردی تاہم اس میں کسی قسم کے جانی نقصان کی اطلاع نہیں ہے۔یہ بھی اطلاعات ہیں کہ سکیورٹی فورسز نے بنوں، میران شاہ اور میر علی جانے والے تمام راستوں کو ہرقسم کی ٹریفک کے لیے بند کردیا ہے۔

واضح رہے کہ گزشتہ کچھ عرصے کے دوران شمالی وزیر ستان میں سکیورٹی فورسز کے قافلوں پر حملوں میں شدت آئی ہے۔ دو روز قبل داوڑ قبیلے کے بیس رکنی جرگے نے حکومت اور طالبان کے درمیان فائر بندی کے لیے جو کوششیں شروع کی تھیں وہ طالبان کی اس دھمکی کے بعد معطل ہوگئیں کہ اگر جرگے میں کسی نے بھی شرکت کی جسارت کی تو اسے’ٹارگٹ کلنگ‘ کا نشانہ بنایا جائےگا۔